Պաշտպանության փոխնախարար Արտակ Զաքարյանն այսօր լրագրողների հետ զրույցում անդրադարձավ այն փաստին, որ օրերս ՊՆ կենտրոնական դեղաբազայում իշխանությունը չարաշահելու և պաշտոնեական կեղծիք կատարելու միջոցով շուրջ 40 միլիոն դրամի հափշտակության դեպք է բացահայտվել: «Մենք առաջին շահագրգիռ կողմն ենք, որպեսզի իրավախախտումները բացահայտվեն, հեղինակներն էլ պատասխանատվության ենթարկվեն: Ցավոք, նման դեպքերը դեռ կան: Լիարժեք չենք կարող ասել, որ բացառված են նման երեւույթները»,-վստահեցրեց Արտակ Զաքարյանը:
Լրագրողները հետաքրքրվեցին՝ պաշտոնատա՞ր անձի կողմից է չարաշահում եղել: «Ըստ էության, այո՝ պատասխանատու պաշտոնյայի կողմից էր: Մանրամասները չեմ ասում, որովհետեւ քննությունն ընթացքի մեջ է»,-պատասխանեց Արտակ Զաքարյանը:
Նա նշեց, որ չարաշահման հետեւանքով բանակին հասցված վնասը փոխհատուցվելու է. «Նման դեպքերում դատական կարգով ինչը հնարավոր է վերականգնել՝ վերականգնվում է»:
Լուիզա ՍՈՒՔԻԱՍՅԱՆ
