Ժողովրդական արվեստի կենտրոնում կանանց տոներին ընդառաջ բացվեց ժողովրդական վարպետների ստեղծագործությունների «Կին արվեստ, տոն» ցուցահանդես-վաճառքը: Ներկայացված են 25 ժողովրդական վարպետների աշխատանքները` փայտի գեղարվեստական փորագրություն, արծաթագործություն,ասեղնագործություն, խեցեգործություն, կարպետագործություն և այլ նմուշներ:
Ժողովրդական արվեստի կենտրոնի գիտական քարտուղար Նանե Բագրատունին ասում է. «Մենք փորձում ենք կարևորել ժողովրդական վարպետների աշխատանքները և բարձրացնել հասարակության մոտ այն գիտակցումը, որ ձեռք են բերում արվեստի նմուշներ»:
Նա նկատեց նաև, որ զբոսաշրջության հետ ավելացել է զբոսաշրջիկների հետաքրքրությունը դեպի ժողովրդական արվեստը:
Մարալ Շէօհմէլեանը Սիրիայից է: 3 տարի Հայաստանում է:Նա ներկայացնում է ասեղնագործ աշխատանքներ:
Ասում է. «Քայլել չգիտեի, բայց ասեղը ձեռքիս էր, նստում էի տատիս կողքին ու նայում, թե ինչպես է ասեղնագործում»:
Անահիտ Գրիգորյանն իր աշխատանքներն ընտրել է գունային, գամային և մարդկանց տարբեր նախասիրությունները նկատի ունենալով:
Ցուցահանդեսը բաց կլինի մինչև մարտի 11-ը:
Սվետա ՊԱՊՈՅԱՆ
