«Այս ընթացքում քանի վարչապետ է փոխվել, բոլորն իրենց տներում, պալատներում տաք-տաք նստած են, իսկ մենք 12 տարի է՝ փողոցներում ենք: Բաղրամյան 26-ից ուղարկում են կառավարություն, այնտեղից էլ` Տարոն Մարգարյանի մոտ, այսպես 12 տարի: Ո՛չ վարձի գումար են տալիս, ո՛չ մտածում` այս մարդիկ ինչպե՞ս են ապրում: Առանց ամաչելու նայում են աչքներիս մեջ ու ասում` պիտի սպասեք, բայց ինչքա՞ն, մեր բնակիչների մի մասը դարդից մահացել է, մյուսներն էլ վարկ են վերցնում, որ տան վարձ տան:
Բայց չէ՞ որ պետության կարիքներից ելնելով են մեր տներն իրացրել, պետությանը վստահելով ենք մենք մեր տներից դուրս եկել: Եթե իմ շահերը պետությունը չի պահում, ինչո՞ւ է ասում` պետության կարիքների համար: Պետությունն այդ ի՞նչ կարիքի մեջ էր, որ այսքան մարդու սարքեց բոմժ: Ուրեմն մեզ համար առաջին խուլիգանը պետությունն է, հետո նոր` կառուցապատողը: Մարդիկ այստեղից բանակ են գնացել, ամուսնացել, այստեղ ապրել, հիմա դարձել են թափառական: Բայց ընտրություններին
սպուտնիկով մեզ գտնում են, որովհետեւ իրանց շահերն են»,- մատնացույց անելով իրենց նախկին տարածքը՝ «Առավոտի» հետ զրույցում ասում են Եկմալյան 6, 8, 14, 12 եւ տասնյակ այլ հասցեների բնակիչները, որոնց տներն իրացվել են հանուն պետության գերակա շահի, սակայն կառուցապատող Գագիկ Պապոյանը, որն այժմ դատապարտված է խարդախության մեղադրանքով, այդպես էլ նրանց բնակարանով չի ապահովել:
Լուսանկարը` ԼՈՒՍԻՆԵ ԲՈՒԴԱՂՅԱՆ-ի
«Առավոտ»
03.03.2018
