ՀՅԴ-ն պատրաստ է քննարկել բոլոր թեկնածությունները, որոնք կառաջադրվեն Հայաստանում հաջորդ վարչապետի պաշտոնի համար, սակայն այդ պաշտոնում թեկնածու առաջադրելու բացառիկ իրավունքը պատկանում է իշխող ՀՀԿ-ին, քանի որ խորհրդարանական ընտրություններում ամենաշատ ձայներն են հավաքել`ապահովելով իրենց համար այդ մենաշնորհը: Այս մասին այսօր լրագրողների հետ ճեպազրույցում ասաց կոալիցիոն ՀՅԴ-ի ներկայացուցիչ Արմեն Ռուստամյանը`պատասխանելով լրագրողների վարչապետի անձին վերաբերող տարբեր հարցերին: Ապա հստակեցրեց`ՀՅԴ-ում պատրաստ են քննարկել ցանկացած թեկնածուի անուն, որ կառաջադրի ՀՀԿ-ն:
Լրագրողները հիշեցրեցին Սերժ Սարգսյանի ավելի վաղ արած հայտարարությանը, որ ինքը չի առաջադրվելու վարչապետի պաշտոնում, Արմեն Ռուստամյանը հակադարձեց. «Սերժ Սարգսյանի հայտարարություններն ավելի լավ, քան ինքը, ոչ ոք չի կարող մեկնաբանել»:
Լրագրողներից մեկը նկատեց` ստացվում է`Սերժ Սարգսյանը դրժում է իր խոստումը: Արմեն Ռուստամյանը հակադարձեց. «Սերժ Սարգսյանն անելիք ունի, ու դրա հետ կապված գնահատականները պիտի տրվեն՝ հաշվի առնելով նրա անցած ուղին: Փոփոխությունները, որ կատարվել են Հայաստանում, առանց նրա չէին լինի: Դրանք բավարար են, որ նրան հարգենք»: Նա նաեւ հավելեց`սահմանադրական փոփոխությունների սկզբից էլ ՀՅԴ-ն անձերով չի պայմանավորել այդ փոփոխությունները, բայց հայտարարել են նաեւ, որ չեն բացառում, որ Հայաստանի հաջորդ վարչապետը լինի Սերժ Սարգսյանը:
Արմեն Ռուստամյանը վստահեցնում է` կառավարման համակարգի փոփոխությունները միտված են անձերին զսպելուն, լիազորությունների բաշխմանը գործադիր, օրենսդիր եւ դատական մարմինների միջեւ, որպեսզի որեւէ անձ չունենա այնպիսի լիազորություններ, որ համակարգն իր ձեռքը վերցնի: Նա հավաստիացնում է, որ եթե Սերժ Սարգսյանը լինի ՀՀ հաջորդ վարչապետը, նա չի ունենալու նույն իրավասությունները, ինչ իրավասություններ ուներ նախագահ Սերժ Սարգսյանը:
Նելլի ԳՐԻԳՈՐՅԱՆ
