Էքստրասենս Անի Մաջնունյանի սպանության գործով այսօր դատարանը հեռացավ խորհրդակցական սենյակ՝ վճիռ կայացնելու: Այսօրվա դատական նիստին ամբաստանյալ Մուշեղ Մխիթարյանը հանդես եկավ պաշտպանական ճառով:
«Հայտնաբերվել է մարմնի վրա ձեռքի հետք, որն իմ ձեռքի հետքը չէ»,- այսօր Էքստրասենս Անի Մաջնունյանի սպանության գործով իր պաշտպանական ճառում ասաց սպանության մեջ մեղադրվող Մուշեղ Մխիթարյանը, հետո դատարանին խնդրեց կրկին հարցաքննության հրավիրել Աննա Միսակյանին՝ պարզաբանելով, որ նրան հարցեր ունի տալու:
Նա պատմեց, որ դեպքի օրը Մաջնունյանի բնակարան է այցելել երեկոյան 22-00-ի շրջակայքում և հեռացել ուշ գիշերին. «Տուժող կողմը, որ ինձնից գումարներ է պահանջում, ասեմ, որ ես այդ գումարների հետ որևէ կապ չունեմ: Ես ոչինչ այդ տնից չեմ վերցրել և շահադիտական սպանություն չեմ կատարել»:
«Քո բոլոր խոսքերին ես պատասխան ունեմ: Ոչ էլ հերքի: Դու մեղավոր ես ու դու ես սպանել իմ երեխային: Դու մոլագար մարդասպան ես: Դու պետք է ցմահ դատապարտվես»,- Մխիթարյանին հակադարձեց տուժողի իրավահաջորդը՝ Լորետա Գոլմիյանը (Անի Մաջնունյանի մայրը) :
Մխիթարյանի պաշտպան՝ փաստաբան Մարինե Ֆարմանյանը ներկայացրեց պաշտպանյալի դրական բնութագրերը, իսկ իր վերջին խոսքում Մխիթարյանն իրեն մեղավոր չճանաչեց, խնդրեց դատարանին ճանաչել իր անմեղությունը:
Դատարանը վճիռը կհրապարակի մարտի 5-ին:
Արփինե ՍԻՄՈՆՅԱՆ
