Խորհրդարանում, ՀՀ չորրորդ նախագահի ընտրության ժամանակ, երբ քվեարկում էր ԱԺ «Ելք» խմբակցության ղեկավար Նիկոլ Փաշինյանը, միջադեպ եղավ: Երբ Նիկոլ Փաշինյանը մտավ քվեախցիկ, որպեսզի քվեարկի, հայտարարեց, որ հաշվիչ հանձնաժողովի նախագահ, ՀՀԿ-ական Գագիկ Մելիքյանը իր թիկունքում կանգնած`հետեւում էր քվեարկությանը: Գագիկ Մելիքյանը պնդեց, որ չի հետեւել քվեարկությանը:
Մանրամասները՝ շուտով տեսանյութում
Արդեն քվեարկությունից հետո, լրագրողների հետ զրույցում, Նիկոլ Փաշինյանը հայտարարեց, որ հիասթափված է ՀՀ նախագահի թեկնածու Արմեն Սարգսյանի` երեկ ԱԺ ամբիոնից ունեցած ելույթից: «Ես չէի մտածի, որ Արմեն Սարգսյանը, լինելով այդքան փորձառու եւ այդպիսի կենսագրության տեր մարդ, ՀՀ նախագահի թեկնածուի կարգավիճակում հանդես կգա այդպիսի խեղճ ու տխուր, մեծ հաշվով որեւէ էներգիա չպարունակող տեքստով»։ Նիկոլ Փաշինյանը կարծում է, որ դա կապված է այն «թակարդի հետ», որի մեջ նրան դրել են իշխանությունները: Նկատի ունի Արմեն Սարգսյանի`ՀՀ քաղաքացիության վիճելի հարցը:
Լրագրողները հետաքրքրվեցին` ապրիլին ՀՀ-ում հնարավո՞ր է կարգավիճակ փոխվի: Նիկոլ Փաշինյանն ասաց` հանրապետությունում այնպիսի իրավիճակ է, երբ փոփոխությունների պետք է սպասել ցանկացած պահի: Եթե, իհարկե, ՀՀ ժողովուրդը կայացնի այդ որոշումը։ «Մենք հասկանում ենք, որ ժողովրդի որոշումը ինքնակազմակերպման արդյունքում պետք է տեղի ունենա: Մենք մեր գործունեությամբ փորձում ենք առավելս նպաստել դրան»,- ասաց նա:
Նելլի ԳՐԻԳՈՐՅԱՆ
