«Սասնա ծռերի» գործով դատական նիստն այսօր հենց սկզբից ընդմիջվեց ամբաստանյալ Կարո Եղնուկյանի վատ ինքնազգացողության պատճառով:
Դատարանը նրա համար շտապօգնություն հրավիրեց: Դատարան հրավիրված բժիշկներն արձանագրեցին՝ Եղնուկյանի արյան ճնշումը բարձր է՝ 170/90: Թեեւ Եղնուկյանը պնդեց, որ ի վիճակի է նիստին մասնակցել, բայց պաշտպանական կողմը՝ հանրային պաշտպան Անուշ Մխիթարյանը միջնորդեց դատական նիստը հետաձգել: Հիշեցնենք, որ նախորդ նիստին Եղնուկյանի պաշտպանը՝ Տիգրան Հայրապետյանը, լքել էր նիստերի դահլիճը, իսկ այսօր չէր ներկայացել դատարան:
Անուշ Մխիթարյանն այսօր միջնորդեց դատարանին հաջորդ դատական նիստի մասին ծանուցել պաշտպաններին, եթե նրանք կրկին չներկայանան, հանրային պաշտպանները շարունակեն պաշտպանությունը: Այսօր դատական նիստին չէին ներկայացել նաեւ այս գործով փաստաբաններ Արա Ղարագյոզյանն ու Արայիկ Պապիկյանը: Հաջորդ դատական նիստը նշանակվեց մարտի 15-ին:
Հիշեցնենք, որ Կարո Եղնուկյանը բերման է ենթարկվել 2016թ. հուլիսի 19-ի լույս 20-ի գիշերը, ապա կալանավորվել է: Եղնուկյանին մեղադրում են «Սասնա ծռեր» խմբի կողմից պատանդներին պահելուն օժանդակելու (38-218 հոդված) ու զավթած շենքերը և շինությունները պահելուն օժանդակելու (38-219 հոդված) մեջ:
Արփինե ՍԻՄՈՆՅԱՆ
