ՀՀ նախագահի թեկնածու Արմեն Սարգսյանին այսօր ԱԺ նիստում հարց ուղղեց «ԵԼՔ» խմբակցության պատգամավոր Արտակ Զեյնալյանը: «Երբ է դադարեցվել ձեր՝ Մեծ Բրիտանիայի քաղաքացիությունը»,-հետաքրքրվեց նա:
Արմեն Սարգսյանը պատասխանեց. «Ճիշտ եք՝ կարեւոր է, թե ես երբ եմ դիմել՝ Մեծ Բրիտանիայի քաղաքացիությունից հրաժարվելու համար: Ես ՀՀ քաղաքացի լինելով՝ դիմել եմ Բրիտանիայում մշտական կեցության եւ քաղաքացիության համար 2000թ.-ին: Կարծում եմ՝ կրկնակի քաղաքացիության ինստիտուտը մեր ազգի հետ կապված իրական ցավալի երեւույթ է: Ես միայն ՀՀ քաղաքացի եմ 2011 դեկտեմբերի 2-ից: Իմ կողմից տրվել են բոլոր պահանջվելիք փաստաթղթերը»:
«ԵԼՔ»-ի մյուս պատգամավոր Մանե Թանդիլյանը շարունակեց գործընկերոջ հարցը. «Արդյոք այդքան բա՞րդ էր հրապարակել այդ տեղեկանքը»: Արմեն Սարգսյանը պատասխանեց. «Կրկնում եմ՝ ինչ փաստաթուղթ պահանջվել է, ներկայացրել եմ»:
Մանե Թանդիլյանն այնուհետեւ հարցրեց. «Դուք միակ թեկնածուն եք, այսինքն՝ ընտրություն չէ սա: Ձեզ սա չի՞ մտահոգում, որ ոչ թե ընտրվում եք, այլ նշանակվում՝ ՀՀԿ-ի կողմից»: Արմեն Սարգսյանն արձագանքեց. «Սահմանադրությունը ես չեմ գրել: Հարցն ինձ չպետք է ուղղվի: Ինձ չէ ուղղված նաեւ հարցը, թե ինչու եմ միայն ես հանդես գալիս որպես թեկնածու: Եթե ընտրվեմ ուրախությամբ կշարունակեմ գործակցել Արտակ Զեյնալյանի հետ»:
Արմեն Սարգսյանը նաեւ հայտնեց, որ չի պատրաստվում որեւէ կուսակցության անդամ դառնալ. «Ես ՀՀԿ անդամ չեմ»:
Լուիզա ՍՈՒՔԻԱՍՅԱՆ
