«Պետք է վերանայել կրթական համակարգը՝ խորհրդային կրթական համակարգից վերցնել լավագույնը եւ ստեղծել նոր կրթական համակարգ»,-ԱԺ-ում այսօր ՀՀ նախագահի թեկնածուի հարցի քննարկման ժամանակ ելույթում ասաց նախագահի թեկնածու Արմեն Սարգսյանը:
Ապա նա անդրադարձավ ներդրումներին. «Բազմաթիվ բարեկամներ ունեմ, որոնց եթե դիմեմ, կօգնեն իմ բարեգործական եւ կրթական ծրագրերին, բայց երբ հարցը հասնում է ներդրումներին, պայմաններ պետք է լինեն՝ կոռուպցիայի վերացումից մինչեւ մշակութային արդարություն: Որեւէ մեկը ներդրում չի անի միայն նրա համար, որ քո բարեկամն է»:
Արմեն Սարգսյանի խոսքով՝ ներդրողի համար բնական ռեսուրսն է կարեւոր եւ երկրի կայունությունը. «Բնապահպանությունը կարեւոր խնդիր պետք է դարձնենք: Ցանկացած օրենք, որ անցնում է ԱԺ-ում, պետք է կոռուպցիոն եւ բնապահպանական «թեստ» անցնի»:
Ելույթի վերջում Արմեն Սարգսյանը վստահեցրեց՝ եթե ընտրվի, իր ողջ եռանդը եւ երկար տարիների փորձը ծառայեցնելու է մեր երկրի, Արցախի հանրապետության եւ Սփյուռքի խնդիրների լուծմանը. «Աշխատելու եմ ամեն ինչ անել, որ իմ գործունեությունը լինի սահմանադրության սահմաններում: Փորձելու եմ լինել շարքային քաղաքացու եւ սփյուռքի նախագահը»:
Լուիզա ՍՈՒՔԻԱՍՅԱՆ
