Այսօր կառավարության նիստից առաջ ՀՀ վարչապետ Կարեն Կարապետյանը անդրադարձավ մայրաքաղաքի մուտքի եւ ելքի պատշաճ տեսքին ու բարեկարգմանը: Վարչապետը հիշեցրեց, որ անցյալ տարի դեկտեմբերին էլ այս հարցը քննարկվել է, մասնավորապես՝ ճանապարհների, ճարտարապետական լուծումների կանոնակարգման և միջավայրի բարեկարգման հարցերը, հատկապես` հաշվի առնելով այս տարվա երեք խոշոր իրադարձությունները և զբոսաշրջային այցերը։
Վարչապետը նշված խնդիրների վերաբերյալ հանձնարարական տվեց. «Հաշվի առնելով, որ հարկավոր է սեղմ ժամկետներում կատարել բարեկարգման աշխատանքները` հանձնարարում եմ Ֆինանսների նախարարին, Քաղաքաշինության պետական կոմիտեի նախագահին, ինչպես նաև առաջարկում եմ Երևանի քաղաքապետին՝ 1-ամսյա ժամկետում համատեղ մշակել «Զվարթնոց» օդանավակայանից դեպի Երևան տանող ճանապարհի հատվածի բարեկարգման, ճարտարապետական մոտեցումների, խորհրդանիշների տեղադրման միասնական լուծումները, ինչպես նաև` նախագծային փաստաթղթերը, այդ թվում` ակնկալվող ֆինանսական ծախսերը և համապատասխան փաթեթը ներկայացնել կառավարության աշխատակազմ»:
Կարեն Կարապետյանը անդրադառնալով Հայաստանի երկրորդ խոշոր քաղաքին, առաջարկեց Գյումրու քաղաքապետին` երկամսյա ժամկետում «Կումայրի վերածնունդ» ներդրումային հիմնադրամի հետ համատեղ ապահովել «Շիրակ» օդանավակայանից դեպի Գյումրի, Գյումրու հրապարակի հարակից տարածք և դեպի Երևան տանող ճանապարհների բարեկարգման, ինչպես նաև` կանաչապատման աշխատանքների ավարտը։
Նելլի ԲԱԲԱՅԱՆ
