Բարձրագույն դատական խորհրդի կազմում առաջին պաշտոնում Գագիկ Հարությունյանի թեկնածությունն էր ներկայացված: Այսօր ԱԺ 105 պատգամավորներից 98-ը քվեարկությանը մասնակցելով՝ նրան ընտրել են այդ պաշտոնում փակ գաղտնի քվեարկությամբ՝ 96 կողմ, 2 դեմ ձայներով:
Նա ընտրվել է հնգամյա ժամկետով:
Խորհրդի անդամի երկրորդ պաշտոնում Գեւորգ Դանիելյանի թեկնածությունն էր ներկայացվել: Քվեարկության արդյունքներով՝ մեկ քվեաթերթիկ համարվել է անվավեր, կողմ է քվեարկել 90 պատգամավոր, դեմ՝ 7:
Նա նույնպես հնգամյա ժամկետով ընտրվել է:
Երրորդ պաշտոնում առաջադրված Լիպարիտ Մելիքջանյանի օգտին քվեարկել է 82 պատգամավոր, դեմ են եղել 15-ը, քվեաթերթիկներից մեկը անվավեր է եղել: Նա նույնպես ընտրվել է:
Չորրորդ պաշտոնում առաջադրված Հայկ Հովհաննիսյանի օգտին քվեարկել է 86 պատգամավոր, 11-ը դեմ է եղել, մեկ քվեաթերթիկ էլ անվավեր է եղել:
Հինգերորդ պաշտոնում առաջադրված Սերգեյ Մեղրյանն էլ ստացել է 87 կողմ ձայն, 10-ը դեմ է եղել, քվեաթերթիկներից մեկն էլ անվավեր է համարվել: Նա եւ Հայկ Հովհաննիսյանը նույնպես ընտրվել են այդ պաշտոններում հնգամյա ժամկետով:
Բարձրագույն խորհրդի ընտրված անդամների երդման արարողությունը տեղի ունեցավ: Նրանք երդվեցին իրենց պարտականությունները կատարել ՀՀ Սահմանադրության եւ օրենքների համապատասխան՝ ապահովելով իրավունքի գերակայությունը, երաշխավորելով դատարանների եւ դատավորների անկախությունը:
Հռիփսիմե ՋԵԲԵՋՅԱՆ
