Այսօր խորհրդարանում փակ գաղտնի քվեարկությամբ պատգամավորներն ընտրում էին Բարձրագույն դատական խորհրդի անդամներին:
Քվեարկության մեկնարկից մի քանի րոպե առաջ մոտեցան ՀՀԿ-ական պատգամավորներ Արտաշես Գեղամյանը եւ Հայկ Բաբուխանյանը: Aravot.am-ը հետաքրքրվեց`առաջի՞նն եք ընտրելու, պարոն Գեղամյան: Արտաշես Գեղամյանն ասաց` չգիտի եւ մեջբերեց Աստվածաշնչից`«Դժվար է ասել, առաջինները կդառնան վերջինները, վերջինները կդառնան առաջինները…»:
Հետո մոտեցան Մանվել Գրիգորյանն ու Սեյրան Սարոյանը: Մանվել Գրիգորյանը պահանջեց. «Տվեք մեր թղթերը»: «Տեղամասի» մոտ կուտակում էր, հերթեր էին գոյացել:
ՀՀԿ-ական Ֆելիքս Ցոլակյանը կատակեց. «Դեղի հերթ է, անալգինի-բանի»: «Ծառուկյան» դաշինքի պատգամավոր Գեւորգ Պետրոսյանն էլ քվեարկեց, բայց մոռացել էր քվեաթերթիկը ընտրատուփի մեջ նետել:
Ընդհանուր առմամբ, ՀՀԿ-ականները հայտարարում էին, որ ընտրությունն առանց կեղծիքների եւ ընտրակաշառքի է ընթանում`ազատ, արդար, թափանցիկ:
Հիշեցնենք, որ Բարձրագույն դատական խորհրդի անդամի թեկնածուներն են Սահմանադրական դատարանի նախագահ Գագիկ Հարությունյանը, Արդարադատության նախկին նախարար Գևորգ Դանիելյանը, իրավագիտության ֆակուլտետի Քաղաքացիական դատավարության ամբիոնի վարիչ Սերգեյ Մեղրյանը, իրավաբանական գիտությունների թեկնածու Լիպարիտ Մելիքջանյանը և Հայաստանի հաշտարարների ինքնակարգավորվող կազմակերպության նախագահ Հայկ Հովհաննիսյանը։
Խորհուրդը նոր մարմին է: Այն պետք է երաշխավորի դատարանների անկախությունը: Նաեւ նախագահին առաջարկելու է դատավորների, դատարանների նախագահների և Վճռաբեկ դատարանի պալատների նախագահների թեկնածուներին: Դատավորին կարգապահական պատասխանատվության ենթարկելու, լիազորությունները դադարեցնելու, դատավորի նկատմամբ քրեական հետապնդում հարուցելու կամ նրան ազատությունից զրկելու վերաբերյալ համաձայնություն տալու հարցերը ևս այս խորհրդի իրավասության ներքո են:
Նելլի ԳՐԻԳՈՐՅԱՆ
