ՀՀ ԱԺ նախկին փոխնախագահ Կարապետ Ռուբինյանը հակված է այն կարծիքին, որ նախընտրական շրջանում Ադրբեջանի նախագահ Իլհամ Ալիեւի՝ «Երեւանը եւ Զանգեզուրը վերադարձնելու» հայտարարությունը գուցե հնարավոր ռազմական գործողություններ է ենթադրում: «Դրա համար բավականին լուրջ հիմնավորումներ կան»,- «Առավոտ»-ի հետ զրույցում ասում է նա:
Իսկ թե ինչու է Ալիեւը նախագահական ընտրությունները հոկտեմբերից տեղափոխել ապրիլ, Կարապետ Ռուբինյանը նկատում է. «Հաշվի առնելով այն, որ ապրիլին փոփոխություններ են սպասվում նաեւ Հայաստանում, փորձում է իր խնդիրն արագ լուծել»: Մեր զրուցակցի խոսքով՝ Ալիեւի վերընտրմամբ Ադրբեջանում առաջիկայում տնտեսական խնդիրներ են հնարավոր, բայց այդ երկրի իշխող կլանները կարծես թե ամուր են. «Անսպասելի զարգացումների ակնկալիքներ կարծես թե չկան: Այլ երկրների պարագայում փաստ է, թե ինչպես են խոշոր կլանները կործանվել, բայց Ադրբեջանի դեպքում ես նախանշաններ չեմ տեսնում»:
Կարապետ Ռուբինյանն ընդգծում է՝ Ալիեւն Ադրբեջանում ոչնչացրել է ընդդիմությունը, ուստի վերընտրվելու հետ կապված խնդիրներ չի ունենա:
ԼՈՒԻԶԱ ՍՈՒՔԻԱՍՅԱՆ
«Առավոտ»
27.02.2018
