ԱԺ պետաիրավական հարցերի եւ մարդու իրավունքների պաշտպանության հանձնաժողովի նախագահի ընտրության հարցն է քննարկվում խորհրդարանում: Այդ պաշտոնում առաջարկվել է Գեւորգ Կոստանյանի թեկնածությունը:
ԱԺ փոխխոսնակ Էդուարդ Շարմազանովն ասաց, որ իր կարծիքով հանձնաժողովի նախագահը պետք է ունենա սկզբունքայնություն, լինի համարձակ, սկզբունքային, ունենա գիտելիքներ, բարձր պրոֆեսիոնալիզմ, թիմայի մտածողություն: Նա ասաց, որ Գեւորգ Կոստանյանը հենց այդպիսին է եւ բացի այդ, նա երբեք իր բաժին պատասխանատվությունը վրայից չի գցել, երբեք իշխանությանը կամ ընդդիմությանը սիրաշահելու խնդիր չի ունեցել:
Շարմազանովը հայտարարեց. «Գեւորգ Կոստանյանի՝ գլխավոր դատախազ նշանակվելուց հետո կոռուպցիոն ռիսկերը նվազել են»: Նա ասաց, որ դատախազը, դատախազի տեղակալը նրա օրոք կոռումպացված չեն եղել եւ մամուլում էլ այդ մասին ոչինչ չկա:
Հրայր Թովմասյանն էլ ասաց, որ շատ հարցերում իրեն ընդդիմադիրները ավելի հեշտ են համոզել, քան Կոստանյանին: Նա խոսեց Կոստանյանի սկզբունքայնության մասին եւ ասաց, որ եթե այդ սկզբունքայնության հետ պրոֆեսիոնալիզմ չլիներ, դա կարող էր դիտարկվել որպես պնդաճակատություն:
Թովմասյանն ասաց, որ կապ չունի Կոստանյանը որտեղ է աշխատել, այդ կառույցի պատիվն իր համար ամենագլխավորն է եղել. «Կարող է ականատեսների մոտ թվացյալ տպավորություն լինի, որ կտրուկ լինելը Կոստանյանին կարող է խանգարել, որովհետեւ հանձնաժողովի նախագահը, երբեմն, կոմպրոմիսներ փնտրելու, սուր ծայրերը հարթելու, նիստը այնպես վարելու, որ դրանք չեզոքանան, գլխավորի շուրջ համախմբում ստանալ՝ դրա համար մի առանձնահատուկ գիծ պետք է լինի նախագահի մոտ, վստահ եմ, Կոստանյանը դա շատ արագ ձեռք կբերի: Նա շատ լավ բանակցող է նաեւ»:
Աժ-ում աշխուժություն առաջացավ, երբ Հրայր Թովմասյանն ասաց, որ Կոստանյանն իր սկզբունքայնության, այս կտրուկության հետ շատ նուրբ հոգի ունի եւ շատ նրբանկատ է: Հասկանալով, որ արդեն ժանրը շեղվում է՝ Թովմասյանը Կոստանյանի նուրբ հոգու թեման փակեց՝ ամփոփելով, որ Կոստանյանը նախանձելի ճկունություն ունի նոր իրավունքի ճյուղի նյուանսներն արագ ընկալելու:
ԱԺ փոխխոսնակ Արփինե Հովհաննիսյանն էլ ասաց. «Ես հասկացա, թե մենք 18:30-ի նիստը ինչու ենք հրավիրել՝ Գեւորգ Կոստանյանի մեծարման ցերեկույթն է, հետո նաեւ երեկոն»:
Հռիփսիմե ՋԵԲԵՋՅԱՆ
