«Մեր բողոքը հիմնավոր էր, ակնկալում էինք արդարադատություն»,-«Իգլա»-ի գործով վերաքննիչ բողոքի մերժումից հետո այսօր լրագրողների հետ զրույցում ասաց ԼՂՀ ՊԲ նախկին հրամանատար, 6 տարվա ազատազրկման դատապարտված Սամվել Բաբայանի շահերի պաշտպան Ավետիս Քալաշյանը:
Անդրադառնալով բողոքի քննության ժամանակ ամբաստանյալների հնչեցրած տեղեկություններին՝ Քալաշյանը հայտնեց՝ նախկինում իրեն հայտնի չի եղել, որ Սանասար Գաբրիելյանին պառնացել են ՕՐՕ դաշինքի շտաբ չբացել:
Ինչ վերաբերում է մամուլի տեղեկություններին, որ ձեռք բերվելիք «Իգլա»-ով պատրաստվում էին նախագահ Սերժ Սարգսյանի ինքնաթիռը խոցել, փաստաբանը նշեց. «Դրանք անհեթեթ տվյալներ են»:
Լրագրողները հետաքրքրվեցին՝ հնարավո՞ր է Սամվել Բաբայանի հանդեպ համաներում կիրառվի. «Համաներումը տարածվում է առանձին արարքների վրա: Բայց անկախ նրանից՝ համաներում կլինի՞, թե ոչ, Սամվել Բաբայանը մտադիր է մինչեւ վերջ բողոքարկել: Ներում խնդրելու տարբերակ էլ իր հետ չեմ քննարկել: Այս գործի պատվիրատուի անուն եւս չի նշել»:
Լուիզա ՍՈՒՔԻԱՍՅԱՆ
