Պատմաբան Արմեն Կարապետյանը եւ լուսանկարիչ Մուշեղ Գասպարյանն առաջիկայում հայ ընթերցողի դատին կհանձնեն Սումգայիթի ջարդերի մասին մի ամբողջ ժողովածու:
Արմեն Կարապետյանն այսօր «Զարկերակ» ակումբում նկատեց, որ սումգայիթյան ջարդերը մոռացության են մատնվել, դուրս եկել օրակարգից: Ըստ նրա՝ ջարդերից երեսուն տարի անց այդ ոճրագործության մասին մի քանի ձեռնարկ կա միայն եւ տարբեր պարբերականներում ցրված նյութեր, իսկ առանձին գրքերով որեւէ բան չի ստեղծվել: Սա նկատի ունենալով՝ բանախոսը Մուշեղ Գասպարյանի հետ փորձում են ստեղծել մի ժողովածու, որի հիմքում այդ օրերին արված լուսանկարներն են:
«Սումգայիթի ջարդերը կարեւոր էր մեզ համար իմաստավորել, որովհետեւ 70 տարի շարունակ խորհրդային իրականության մեջ մեզ դասեր էին տալիս, որ ապրում ենք մի միասնական ընտանիքում, որ այդ ընտանիքում հայը, ռուսը, ադրբեջանցին ու մնացած ազգությունները եղբայրներ են, բայց այդ լեգենդը հօդս ցնդեց 1988-ի փետրվարյան վերջին օրերին: Սումգայիթում կատարված ոճիրը հօդս ցնդեցրեց ժողովուրդների բարեկամության մասին լեգենդը: Սումգայիթը ցույց տվեց, որ թուրք էթնոսը բնավ չի փոխվում, նրանց հոգեկան կերտվածքի մեջ մնացել են նույն վայրենի բնազդները, ինչը հատուկ էր նրանց միջնադարում ու մինչեւ մեր օրերը»:
Արփինե ՍԻՄՈՆՅԱՆ
