ՀՀ վերաքննիչ քրեական դատարանն այսօր մերժեց «Իգլա»-ի գործով վերաքննիչ բողոքը, որը ներկայացրել էր ԼՂՀ պաշտպանության բանակի նախկին հրամանատար Սամվել Բաբայանը, նրա մարտական ընկեր Սանասար Գաբրիելյանը, եւ գործով մեկ այլ մեղադրյալ Արմեն Պողոսյանը: Դա նշանակում է, որ նրանց դատավճիռը մնում է օրինական ուժի մեջ: Այս դատարանի որոշումը հնարավոր է բողոքարկել Վճռաբեկ դատարանում՝ մեկամսյա ժամկետում:
Հիշեցնենք, որ նրանք մեղավոր էին ճանաչվել ՀՀ «Իգլա» զինատեսակ փոխադրելու մեջ եւ դատապարտվել ազատազրկման՝ համապատասխանաբար 6, 3 եւ 2 տարվա ազատազրկման: Բաբայանը մեղավոր էր ճանաչվել նաեւ փողերի լվացման համար: Նա ավելի վաղ հայտարարել էր, որ անցնելու է բոլոր դատական ատյաններով, քանի որ իրեն մեղավոր չի ճանաչում:
Սամվել Բաբայանը լրագրողների հարցերին չարձագանքեց ու չհստակեցրեց, թե, ի վերջո, ով է «իր դեմ այս գործի պատվիրատուն»:
Լուիզա ՍՈՒՔԻԱՍՅԱՆ
