Մեկնաբանելով Ադրբեջանի նախագահի վերջին հայտարարությունը, թե «Երևանը, Զանգեզուրը ադրբեջանցիների պատմական տարածքներն են», և այդ տարածքները վերադարձնելն իրենց ստրատեգիական նպատակն է, Ադրբեջանում Միացյալ Նահանգների նախկին դեսպան, Ջորջ Մեյսոն համալսարանի հրավիրյալ պատվավոր պրոֆեսոր Ռիչարդ Կոզլարիչն ասաց, որ այդ հայտարարությունը նոր չէ, անօգուտ է և անհասկանալի սպասվող նախագահական ընտրությունների համատեքստում:
«Նախագահ Ալիևն ուզում է փայլեցնել իր ազգայնական վկայականն ընտրությունների առաջ: Բայց նման հայտարարություններն ինձ լավատեսություն չեն ներշնչում ղարաբաղյան հարցի շուրջ դիվանագիտական գործընթացի և խնդիրը խաղաղ ճանապարհով լուծելու առումով: Նույն տրամաբանությամբ, ես հավասարապես օգտակար չեմ համարում Հայաստանի կողմից Ադրբեջանի տարածքները օկուպացման մեջ պահելը: Ես մտահոգված եմ, որ մենք ապրում ենք շատ վտանգավոր ժամանակներում, երբ զինված հակամարտության վերսկսման վտանգը Հայաստանի և Ադրբեջանի միջև գնալով մեծանում է»,- նշեց Ռիչարդ Կոզլարիչը՝ որպես վերջաբան առաջարկելով կարդալ ԱՄՆ Ազգային հետախուզության տնօրեն Քոութսի հեղինակած «Համաշխարհային սպառնալիքների գնահատման» 2018 թ. զեկույցը, որում ամերիկյան հետախուզական համայնքն արտահայտել է իր մտահոգությունը հայ-ադրբեջանական պատերազմի վերսկսման վտանգի վերաբերյալ:
Արամ ՍԱՐԳՍՅԱՆ
Հարցազրույցն ամբողջությամբ՝ «Ժամանակ» օրաթերթի այսօրվա համարում
