Զոքանչին կացնահարողի ցուցմունքից. «Թագուհին ճանկռել է, իսկ մայրը՝ ապտակել՝ պատճառելով ֆիզիկական ցավ». (Տեսանյութ)

Այսօր Շենգավիթ վարչական շրջանի ընդհանուր իրավասության դատարանում նախկին կնոջն ու զոքանչին կացնահարած Վլադիկ Մարտիրոսյանի բողոքով դատական նիստն էր:

Հիշեցնենք, որ 2016 թվականի հուլիսի 8-ին Երեւան քաղաքի Տարոնցի նրբանցքի 7-րդ շենքի շքամուտքի աստիճանների վրա տեղի ունեցած վիճաբանության ժամանակ Վլադիկ Մարտիրոսյանը կացնով բազմաթիվ հարվածներ էր հասցրել զոքանչին՝ Կարինե Մանսուրյանին, կնոջը՝ Թագուհի Մանսուրյանին, եւ աներոջը՝ Վաչագան Մանսուրյանին:

64-ամյա Կարինե Մանսուրյանը մահացել էր, իսկ Թագուհին եւ նրա հայրը մարմնական վնասվածքներ էին ստացել:

Այսօրվա դատական նիստում, Թագուհի Մանսուրյանն էր մեղադրվում Վլադիկ Մարտիրոսյանին վնասվածքներ հասցնելու՝ ձեռքը, թեւը, պարանոցը ճանկռելու համար:

Մանսուրյանը մեղադրվում է Քրեական օրենսգրքի 118-րդ հոդվածով, 3 դրվագներով՝ երեք տարբեր օրերին Վլադիկ Մարտիորսյանին ճանկռելու համար:

Նույն հոդվածով, բայց 4 դրվագով Վլադիկ Մարտիրոսյանն էլ է մեղադրվում:

Հիշեցնենք, նաեւ, որ Մարտիրոսյանի նկատմամբ մեկ այլ գործով էլ մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով՝ «սպանություն» եւ 104-րդ հոդվածի 2-րդ մասի 1-ին կետով՝ «սպանության փորձ»:

10Այսօր դատական ճառով պետք է հանդես գային 2 կողմերը, սակայն Մարտիրոսյանի պաշտպանի ճառը հետաձգվեց, քանի որ Մարտիրոսյանի ներկայացուցիչն, ինչպես ինքն ասաց, ծանրաբեռնվածության պատճառով չի պատրաստել այն:

Մարտիրոսյանն առարկեց եւ թույլ չտվեց, որպեսզի մենք նիստի ընթացքում տեսանկարահանենք իրեն:

Թագուհի Մանսուրյանը դատարանում պնդեց՝ «Ես իրեն չեմ ճանկռել»:

Ապա` Մանսուրյանի պաշտպանը՝ Անժելա Հոբոսյանը ներկայացրեց իր ճառը: Հոբոսյանի ներկայացմամբ՝ դատաբժշկական եզրակացություն չի տրվել, որ Թագուհի Մանսուրյանն իսկապես ճանկռել է Վլադիկ Մարտիրոսյանին, ընդ որում, իր ցուցմունքներում Մարտիրոսյանը նշել է մարմնի մի հատված, իսկ եզրակացությունում մարմնի մեկ այլ հատվածի վրա է վնասվածք արձանագրվել:

Կացնահարելուն նախորդած ժամանակահատվածում, ըստ Մարտիրոսյանի ցուցմունքի, նախկին կինն ու զոքանչը ծեծի են ենթարկել իրեն:  Թագուհի Մանսուրյանի մայրը, մինչ կացնահարության օրը, վիճաբանության ժամանակ, ըստ փաստաբանի, Վլադիկի՝ Թագուհու վրա գիշերը  հարձակվելիս դստերը պաշտպանելու նպատակով ձեռնափայտով հարվածել է Մարտիրոսյանին:

Սակայն Թագուհի Մանսուրյանը, ըստ պաշտպանական ճառի, երբեք չի ճանկռել Մարտիրոսյանին: Բացի այս, կրկին Մանսուրյանի եւ նրա պաշտպանի ներկայացմամբ՝ Մանսուրյանի եղունգներն արհեստական են, սիլիկոնե, եւ դրանք չեն կարող մարդու մարմինը վնասել, ճանկռել կամ վնասվածք պատճառել: «Մեղադրանք անհիմն է եւ չապացուցված»,-իր ճառում նշեց Հոբոսյանը:

Մանրամասները՝ տեսանյութում

Հոբոսյանի ներկայացմամբ՝ «Նախաքննական մարմինն ապացույցներն առանց վերլուծելու, համադրելու, առանց ստուգելու ապացույցների ձեռք բերման աղբյուրը՝ Թագուհի Մանսուրյանին մեղադրանք է առաջադրել»:

Վլադիկ Մարտիրոսյանը տաքսի մեքենա է վարել, եւ ըստ Հոբոսյանի, չի բացառվում, որ նա իր մարմնի վնասվածքը ստացել է մեքենան նորոգելիս՝ սուր եզր ունեցող բութ առարկայով, օրինակ՝ պտուտակահանով. «Այս առումով մեղադրանքը պարզ ու հասկանալի չէ, թե սուր եզր ունեցող բութ առարկա նշելով ի՞նչ է նկատի ունեցել փորձագետը կամ նախաքննական մարմինը, որովհետեւ պաշտպանական կողմը զրկվել է հիմնավոր պաշտպանություն իրականացնելու իր իրավունքից, հետեւաբար խախտվել է արդար դատաքննության իրավունքը»:

Մանրամասները՝ տեսանյութում

Հոբոսյանը, Վլադիկ Մարտիրոսյանի ցուցմունքից էլ մեջբերեց, ըստ որի, Մարտիրոսյանն ասել է՝ «Թագուհի Մանսուրյանը ճանկռել էր ձախ ձեռքը, իսկ մայրը՝ Կարինե Մանսուրյանը 3 ապտակ է հասցրել դեմքին՝ պատճառելով ֆիզիկական ցավ»:

Մանրամասները՝ տեսանյութում

Հաջորդ նիստին, որը նշանակվեց մարտի 27-ին, ժամը 13:30-ին, Մարտիրոսյանի եւ նրա պաշտպանի ճառը պետք է լսի դատարանը:

Նելլի ԲԱԲԱՅԱՆ