Տիգրան Մեծ փողոցի «Երեւան սիթիում» վաճառվող ռուսական արտադրության եւ ժողովրդին ավելի հայտնի «բատոնչիկ» կոնֆետները փչացած են: Դրանց փաթեթները բացելուն պես ակնհայտ երեւում է, որ որդերն այստեղ մի լավ քչփորել են, քանի որ կոնֆետները, այսպես ասած, տարօրինակ «ծակոտիներով էին»: Համենայնդեպս, նախկինում այս նույն խանութից ձեռք բերված նույն կոնֆետները նկարում պատկերված տեսքը չեն ունեցել:
«Առավոտն» ահազանգել էր Սննդի անվտանգության պետական ծառայություն, որն էլ երեկ ահազանգից հետո այցելել է նշված սուպերմարկետ եւ ուսումնասիրել: Ըստ ՍԱՊԾ-ի՝ կոնֆետները որդնած չեն, նույնիսկ ժամկետանց չեն՝ ըստ փաստաթղթերի: ՍԱՊԾ-ից խոստացան ավելին պարզել:
Առնվազն անհասկանալի է, որ ՍԱՊԾ-ն խնդիր չի տեսել այս կոնֆետներում, որովհետեւ անգամ անզեն աչքով նկատելի է, որ դրանք հին են, փչացած, նույնիսկ տարօրինակ համով:
Լուսանկարը՝ ՆԵԼԼԻ ԲԱԲԱՅԱՆԻ
«Առավոտ»
24.02.2018
