Էքս-նախագահ Ահմադի Նեժադը պետության ղեկավար պրն Խամենեին խնդրել է վերանայել առաջնորդի գրասենյակի գործունեությունն ու կառուցվածքը, լուծարել Իսլամական Խորհրդարանը, պաշտոնազրկել հանրապետության և դատական ատյանի նախագահներին, նշանակել խորհրդարանական ու նախագահական նոր ընտրություններ, զինված ուժերին հեռու պահել ընտրություններին միջամտելուց և Հիմնական Օրենքի Պահապան խորհրդին արգելել ընտրական մեքենայություններ (Election engineering) կատարել։
Հարկ է նշել, որ Պահապան խորհուրդն ունի լայն իրավասություններ և խորհրդարանական կամ նախագահական ընտրությունների հարյուրավոր թեկնածուների մերժում է։ Այս խորհուրդը անցյալ տարի առաջնորդի խորհրդով մերժեց նաև Ահմադի Նեժադի նախագահ դառնալու ցանկությունը․վերջինս 2005-2013 թվականին եղել է երկրի նախագահ և 2017 թվականին որոշել էր մեծ քաղաքականություն վերադառնալ, բայց մերժվեց։ Նա իր նախագահության ութ տարիների ընթացքում եղել է առաջնորդի հովանավորյալը, պաշտպանել է դատական ատյանի աշխատանքները, կատարել է տասնյակ ապօրինություններ և 2009 թվականի հարյուր հազարավոր ցուցարարներին և իր քաղաքական մրցակից Մուսավիի ու Քառուբիի կողմնակիցներին անվանել է թափթփուկ, ոչնչություն ու ծղոտ։
Իրանի մամուլը նրան համարում է երկրի երևակայական Նապոլեոնը, որ հավակնում է փրկել երկիրը։ Փորձագետները հիշեցնում են նրա օրոք տեղի ունեցած հանցագործություններն ու բազում զեղծարարությունները և զարմացած են առաջնորդ Խամենեու այժմյան լռությունից․Ահմադի Նեժադի խիստ քննադատությունների և հականե-անվանե մեղադրանքների նվազագույնը հնչեցրած մարդիկ, այսօր գտնվում են բանտերում։ Էքս-նախագահը երկրի դատական ատյանը և խորհրդարանը ղեկավարող Լարիջանի եղբայրներին դիմում է ծայրահեղ բացասական որակումներով և նրանց մեղադրում է դրամաշորթության, հողատարածքների զավթման ու տասնյակ հանցանքների համար, բայց նրան դեռևս պատասխանատվության չեն կանչում։ Ահմադի Նեժադի գաղափարները մերժում են թե արմատական և թե բարեփոխական կոչվող հոսանքները, բայց փորձագետները կարծում են նա հենարան ունի զինված ուժերի և հատկապես Իսլամական հեղափոխության պահապանների կորպուսի մի հատվածի և երկրի սոցիալապես անապահով, հաճախ նաև կիսագրագետ խավի մոտ․ ոմանք նաև այն կարծիքին են, որ Ահմադի Նեժադի ակտիվանալը առաջնորդի գրասենյակի պրոյեկտներից է։
Տիգրան ԴԱՎԹՅԱՆ
