Փողերի լվացման և ահաբեկչության ֆինանսավորման դեմ միջազգային պայքարի «Ֆինանսական միջոցառումների աշխատանքային խումբ-ՖԱԹՖ»ը (Financial action task force on money laundering– FATF, Группа разработки финансовых мер борьбы с отмыванием денег) չորս ամսով երկարաձգել է Իրանի դեմ պատժամիջոցներ կիրառելու որոշման առկախումը։ Սրանով Իրանին ժամանակ է տրվում, որպեսզի խորհրդարանում ավարտին հասցնել փողերի լվացման և ահաբեկչության ֆինանսավորման դեմ պայքարի օրենքի մշակումը և միանալ միջազգային շարժման։ Այս խմբի հավանական պատժամիջոցներն ավելի կբարդացնեն Իրանի` առանց այդ էլ անմխիթար վիճակում գտնվող բանկային համակարգի աշխատանքը։ Միջազգային այս կառույցը հիմնվել է 1989 թվականին G7-ի (աշխարհի յոթ հզոր տնտեսական տերությունների) կողմից, որին միացել են աշխարհի ֆինանսական կարևոր կենտրոններ համարվող 29 երկիր, Եվրամիությունը և Ծոցի (Պարսից) երկրների համագործակցության խորհուրդը։ Իրանը և Հյուսիսային Կորեան գտնվում են այս խմբի սև ցուցակում, բայց Իրանին ժամանակ է տրվել ֆինանսական իր օրենքները համապատասխանեցնել այս կառույցի կանոններին։ Իրանի դեմ պատժամիջոցներից և հատկապես բանկային գործարքների սահմանափակումից դժգոհում են նաև Հայաստանի կամ ՀՀ ռեզիդենտ հանդիսացող իրանցի գործարարներն ու անհատները։
Տիգրան ԴԱՎԹՅԱՆ
