Հայաստանի օլիմպիական թիմն ավարտեց ելույթները Փհենչհանում ընթացող 23-րդ ձմեռային օլիմպիական խաղերում: Մեր վերջին ներկայացուցիչը՝ Աշոտ Կարապետյանը, այսօր մասնակցեց լեռնադահուկային սպորտի հատուկ ոլորավայրէջք մրցաձեւում եւ զբաղեցրեց նախավերջին՝ 42-րդ հորիզոնականը:
Փհենչհանում գտնվող մարզական լրագրող Խաչիկ Չախոյանը եւ ֆոտոլրագրող Ասատուր Եսայանցը «Առավոտի» հետ զրույցում պատմեցին.
«Հայտավորված մարզիկներից ոչ բոլորին հաջողվեց հատել վերջնագիծը: Նրանք, ովքեր պայքարում էին մեդալի համար, ռիսկի դիմեցին ու դուրս մնացին մրցաշարից:
Լեռնադահուկային սպորտի կարեւոր գաղտնիքներից մեկն այն է, որ մասնակիցները ծանոթ չեն մրցումային դահուկուղուն: Նրանք մարզումներն անցկացնում են այլ մրցուղում: Բացի դա, առաջին մեկնարկից հետո կազմակերպիչները փոխում են դարպասները՝ հերթական անակնկալ մատուցելով մասնակիցներին: Մեր լեռնադահուկորդը, կարելի է ասել, կատարեց նվազագույն առաջադրանքը՝ երկու մեկնարկներում էլ հատելով վերջնագիծը: Դրա համար մեր լեռնադահուկորդը զգուշություն դրսեւորեց:
Առաջին մեկնարկին մասնակցած 107 լեռնադահուկորդներից վերջնագծին հասան 52-ը: Աշոտ Կարապետյանն այդ ցուցակում 50-րդ տեղում էր: Նա շրջանցեց միայն ԿԺԴՀ-ի երկու մասնակիցներին: Երկրորդ մեկնարկի գլխավոր անակնկալն այն էր, որ առաջատարը՝ նորվեգացի Հենրիկ Քրիստոֆերսենը, չկարողացավ անցնել մրցուղին ու դուրս մնաց մրցումներից: Աշոտ Կարապետյանը երկրորդ մեկնարկում էլ հասավ վերջնագծին եւ վերջնական արդյունքով՝ զբաղեցրեց 42-րդ տեղը: Ընդ որում, երկրորդ մեկնարկում էլ եղան մի քանի մարզիկներ, որոնք չհասան վերջնագիծ ու ստացվեց այնպես, որ մեր լեռնադահուկորդը նախավերջին տեղը զբաղեցրեց:
Որ Կարապետյանը երկու մեկնարկներում էլ հատեց վերջնագիծը, ինչ-որ տեղ արդեն լավ արդյունք է, համենայնդեպս՝ մեզ համար: Սակայն նշենք, որ կային մարզիկներ, որոնց մեր լեռնադահուկորդը կարող էր շրջանցել: Ուզբեկստանի, Կոսովոյի, Ղրղըզստանի եւ նման երկրների մարզիկներին կարելի էր հաղթել: Ինչեւէ, 18 տարեկան Աշոտ Կարապետյանի համար այս օլիմպիական խաղերի մասնակցությունը մեծ փորձ էր»:
Պայքարից հետո Աշոտ Կարապետյանը մեր գործընկերներին ասել է. «Կարծում եմ՝ վատ չէր, որ կարողացա արդյունք ցույց տալ, թեկուզ ոչ այնքան բարձր: Բայց եթե հաշվի առնենք, որ 107 մասնակից կար, 42-րդ տեղը համարում եմ լավ արդյունք: Դեռեւս 18 տարեկան եմ եւ մարզական կյանքս առջեւում է: Սա փորձ էր, որը ինձ պետք էր ու կօգնի ապագայում»:
Փհենչհանում Հայաստանը ներկայացնում էին դահուկորդներ Միքայել Միքայելյանը, Կատյա Գալստյանը եւ լեռնադահուկորդ Աշոտ Կարապետյանը:
ԱՇՈՏ ՀԱԿՈԲՅԱՆ
Լուսանկարը՝ Ասատուր Եսայանցի
Փհենչհան-Երեւան
«Առավոտ»
23.02.2018
