2015 թվականին Նորք Մարաշում վնասազերծված «զինված խմբի» գործով դատաքննության ժամանակ այսօր, երբ մեղադրող դատախազը ներկայացնում էր գրավոր մի շարք ապացույցներ, խմբի պարագլուխ համարվող Արթուր Վարդանյանը դժգոհություն հայտնեց:
Նա դժգոհեց, որ մեղադրող կողմը ներկայացնում է այն տվյալները, որոնք իրեն են հետաքրքիր ներկայացնելու համար՝ զենք, զինամթերք, հանցագործ:
Ըստ ամբաստանյալի, մեղադրող կողմը այլ տեղեկություններ տետրերում չի գտել՝ 64 մլրդ դոլարի թալանի, ապրիլյան պատերազմի, Ցեղասպանության, ցույցեր կազմակերպելու իրավունքի, Արցախի 5 շրջանները վերադարձնելու և այլնի մասին:
Արթուր Վարդանյանը նաեւ հարցրեց, թե ինչպես է նախաքննական մարմինը որոշել, որ որոշակի հեռախոսահամարներ գաղտնի, իսկ մյուսները հիմնական են, եթե ավելի շատ գաղտնի է, ո՞նց է գաղտնի:
Նշենք, որ մեղադրող դատախազն այսօր ներկայացնում էր Նորք Մարաշի տնից առգրաված իրերի ցանկը, այդ թվում ամբաստանյալների բջջային հեռախոսները, որոնցից մի մասը գաղտնալսվել է:
Ամբաստանյալ Արա Պողոսյանը դատարանի ուշադրությունը հրավիրեց այն հանգամանքի վրա, որ իր ու Էդվարդ Ներսիսյանի հեռախոսազրույցները գաղտնալսվել են՝ առանց գաղտնալսման սանկցիա ունենալու: Նա հայտարարեց նաեւ զննության արձանագրության մեջ նշված է, որ իր աշխատանքային համազգեստը առգրավվել է Մարաշի տնից, մինչդեռ այն առգրավվել է իր տնից:
Դատական հաջորդ նիստում դատարանը կշարունակի հետազոտել գործում առկա ապացույցները:
Արփինե ՍԻՄՈՆՅԱՆ
