2015-ին Նորք-Մարաշում վնասազերծված «զինված խմբի» գործով դատաքննությանն այսօր շարունակվեց ապացույցների հետազոտումը:
Մեղադրող դատախազը գործով ձեռքբերված ապացույցներից առանձնացրեց Նորք-Մարաշի առանձնատանը հայտնաբերված իրերի ցանկը՝ ՀՀ դրոշ, ռադիոկապ, Գյումրի քաղաքի զբոսաշրջիկների համար նախատեսված քարտեզ՝ նշումներով, նշագրված են եղել քաղաք տանող կարեւոր հանգույցներ, քաղաքի տներ, ոստիկանական հենակետեր:
Հայտնաբերվել է նաեւ ՀՀ քարտեզ ՝ ձեռագիր կլոր նշագրումներով, օրինակ՝ 80+5= գրավում:
Ինչպես նաեւ Սահմանադրության վերաբերյալ փաստաթղթեր, մեղադրյալ Հայր Անտոնի կողմից խմբի պարագլուխ Արթուր Վարդանյանին հասցեագրված նամակ, որը ծրարում էր դրված:
Հայտնաբերվել է նաեւ սպիտակ երկու թուղթ, որի վրա նշումներ էին արված կարմիր ու կապույտ գրիչներով, թղթերից մեկի վրա նշված էին նախարարությունների անուններ, որոնց դիմաց համապատասխան անուն-ազգանուններ:
Մյուս թղթի վրա գրված էր՝ լուծարել ԱԺ-ն, կարեւորը, որ սպան գիտենա իր արժեքը՝ երկրի խաղաղությունն ու անվտանգությունն ապահովելու համար:
Նշված տնից բացահայտվել են նաեւ նոթատետրեր, որտեղ, ըստ մեղադրող դատախազի, ծածկագրված բառերով գրված էին խմբի անդամների մականուններ, նրանց տիրապետության տակ գտնվող զենք-զինամթերքի մասին տեղեկություններ: Ծածկագրման եղանակով գծագրվել են այն տեղանքները, որոնք հետաքրքրություն են ներկայացրել խմբի անդամների համար;
Մեկ այլ նոթատետրում հայերենով ու լատինատառ տառերով գրված էին խմբի ծախսերը, ապա խմբի անդամների անունները՝ ըստ տեղանքների բաշխված, օրինակ Խաչիկ Ավետիսյան՝ Բ 26, Արթուր՝ ԱԺ եւ այլն:
Մեկ այլ նոթատետրում առկա էին խմբի անդամների կենցաղային ծախսերի մասին գրառումներ, ինքնակպչուն ժապավեն եւ գրառումներ, թե տան որ սենյակում ինչ զենք ու հագուստ է պահվում, առանձին էջերում գծագրումներ են եղել:
Նորք-Մարաշի տնից հայտնաբերվել է նաեւ կրիչ, որում եղել է Արթուր Վարդանյանի հարցազրույցը, ինչպես նաեւ վերջինիս, Լիլիթի ու Վահան Շիրխանյանի առանձնազրույցը եւ իշխանությունը զավթելուց հետո եթեր գնալու համար նախատեսված Արթուր Վարդանյանի ուղերձը:
Արփինե ՍԻՄՈՆՅԱՆ
