«Ելք» խմբակցության պատգամավոր Արտակ Զեյնալյանը ԱԺ-ում Պետաիրավական հարցերի հանձնաժողովի նիստում հայտարարեց, որ Մարտի 1-ի զոհերի թիվը թաքցնում են 10 եւ ավելի զոհ կա,: Նա ասաց, որ այդ օրը փողոցում տեսել են նաեւ մարդկային լեզու եւ ծնոտ, բացի այդ, «Նիվա» մակնիշի մեքենայով վրաերթի են ենթարկել մի մարդու, որը դժվար թե ողջ մնար դրանից հետո, բայց գործում նրանց մասին խոսք չկա, իսկ հայտնաբերված զոհվածներից որեւէ մեկի ծնոտը, լեզուն պոկված չէ:
Այսօր «Ելքի» հրավիրած խորհրդարանական լսումների ժամանակ ՀՀԿ պատգամավոր Ջեմմա Բաղդասարյանը Գլխավոր դատախազության հատկապես կարեւոր գործերով քննության վարչության պետի տեղակալ Կարեն Բիշարյանին հարցրեց՝ տեղյա՞կ է այդ մասին եւ ի՞նչ տեղեկություններ ունեն: Նա պատասխանեց, որ զարմացել է, երբ լսել է Զեյնալյանի այդ պնդումը, որովհետեւ իրենք որեւէ փաստ չունեն այդ մասին. «Անձի մահանալու փաստը չի կարող թաքցվել, սպանությունը չի կարող լատենտային մնալ, դա բացառված երեւույթ է: Նման դեպք հնարավոր չէ, որեւէ անձի հարազատ որեւէ ահազանգ չի արել, որեւէ տեղեկատվություն այդ մասին մեզ չի փոխանցվել: Ինչ վերաբերում է «Նիվա» մակնիշի մեքենայով վրաերթի ենթարկելուն, տեսանյութերում նման բան չկա, կա «Վիլիս» մակնիշի ավտոմեքենայով վրաերթի ենթարկելու հանգամանք, մարդկանց միջով այդ մեքենան անցնում է, դա քննությամբ պարզված հանգամանք է: Որեւէ մեկը չի մահացել, ստացել են մարմնական վնասվածքներ»:
Հռիփսիմե ՋԵԲԵՋՅԱՆ
