ՀՀԿ խմբակցության պատգամավոր Կարեն Ավագյանը վրդովված է՝ մարդիկ դեռ փորձում են մարտի 1-ի էջն օգտագործել:
Aravot.am-ի հետ զրույցում պարոն Ավագյանը, անդրադարձ կատարելով ԵԼՔ դաշինքի՝ մարտի 1-ի դեպքերի հետ կապված խորհրդարանական լսումներ կազմակերպելու նախաձեռնությանն, ասաց. «Հասկանալի է՝ այդ դառը էջը միշտ էլ կարելի է օգտագործել երևալու, ջրի երես մնալու, ինքնախաբեություն-օրակարգ ձևավորելու համար։ Բա հետևանքնե՞րը։ Բա կրկին պատճառվող ցա՞վը։ Իրոք անհասկանալի է։ Մարտի 1-ը խորը վերք է ոչ միայն հարազատների, այլև մեր երկրի ու մեզանից յուրաքանչյուրի համար»։
Կարեն Ավագյանը հորդորում է քաղաքական նկրտումները բավարարելու համար ամեն անգամ չցավեցնել մարդկանց:
ՀՀԿ-ական պատգամավորի վստահեցմամբ՝ բոլոր կողմերն անցած տասը տարիներին այդ մասին բարձրաձայնել են, խնդիրը բազմակողմանի քննարկվել է, այդ թվում նաև՝ իրավական հարթությունում:
Եզրափակելով Կարեն Ավագյանն ասաց. «Թվում է՝ տարիներ անց մենք մարտի 1-ի մասին բոլորս պարտավոր ենք խոսել «Այլևս երբեք» նշանաբանով միայն, բայց, ցավոք, մարդիկ դեռ փորձում են այդ դառը էջն օգտագործել ու օգտագործել»:
Լուսինե ՄԻՆԱՍՅԱՆ
