Օրեր առաջ տեղեկացրել էինք, որ Լոռու մարզի Եղեգնուտ համայնքի բնակիչ Արտիկ Աղաջանյանը դժգոհում է, ասելով, որ 9 տարի առաջ ՎիվաՍել-ՄՏՍ ընկերությունն իր տարածքում է տեղադրել բջջային հիմնական կայան, սակայն դրա դիմաց տրամադրվող գումարն այս տարիներին ստացել է համայնքի ղեկավարը:
– Էդ հողամասը ես օգտագործում եմ 1991 թվականից, դրա համար էլ պարտաճանաչ հարկերը մուծում եմ, բայց էդ փողն ուրիշն ա ստանում,- ասում է Արտիկը:
Եղեգնուտի գյուղապետ Միշա Հովհաննիսյանն էլ մեզ հետ զրույցում, վստահեցրեց, թե նշված կայանը տեղադրված է համայնքային տարածքում. «Հիմա կարող է մեկ ուրիշն էլ գա, ասի` դա իմ տարածքում է գտնվում: 9 տարի է, ու հանկարծ հիշել են, որ դա վճարովի է: Դա էլ վճարվում է պետական բյուջե, դա մասնավոր մարդու չէ, ո՛չ գյուղապետինն է, ո՛չ աշխատակազմինը»:
Ստեղծված իրավիճակի վերաբերյալ Aravot.am-ը փորձեց պարզաբանում ստանալ ՎիվաՍել-ՄՏՍ ընկերությունից: Ընկերությունից մեզ տեղեկացրեցին, որ բջջային հիմնական կայանի տեղակայման նպատակով, համապատասխան վարձավճարի դիմաց Եղեգնուտ համայնքի վարչատարածքում «ՄՏՍ Հայաստան» ՓԲ ընկերությանը վարձակալման է հանձնվել 200 ք.մ մակերեսով հողատարածք, եւ որ սույն պայմանագիրը կնքվել է ընկերության եւ համայնքի ղեկավարի միջեւ. «ՎիվաՍել-ՄՏՍ-ի եւ Եղեգնուտ համայնքի ղեկավար Միշա Հովհաննիսյանի միջեւ կնքված պայմանագիրը կնքվել է օրենքի պահանջներին համապատասխան, հաստատված է նոտարի եւ Անշարժ գույքի կադաստրի պետական կոմիտեի կողմից:
Սեփականության կարգավիճակի ճշգրտմանն առնչվող հարցերի քննարկումը դուրս է ընկերության իրավասության շրջանակներից:
ՎիվաՍել-ՄՏՍ-ը հանդիսանում է հեռահաղորդակցության ծառայություն մատուցող ընկերություն, եւ տվյալ հողատարածքն օգտագործում է բուն նպատակի համար՝ վերջինիս վարձակալության դիմաց պարտաճանաչ կերպով վճարելով ամսական վարձավճար»:
Տաթեւիկ ՂԱԶԱՐՅԱՆ
