Ամերիկայի Միացյալ Նահանգները Հայաստանին և մի քանի այլ երկրների զգուշացրել է, որ նրանք պատժամիջոցների սպառնալիքի տակ կհայտնվեն, եթե շարունակեն սպառազինություն գնել Ռուսաստանից: Բայց այդ երկրների շարքն այնքան մեծ է, որ կասկածի տակ է դրվում պատժամիջիցների կիրառման հնարավորությունը, Eurasianet.org-ում գրում է Ջոշուա Կուչերան:
Ռուսաստանը աշխարհի երկրորդ սպառազինություն արտահանող երկիրն է, ուստի տեսականորեն ռիսկի տակ գտնվողների ցանկը շատ մեծ է: Մասնավորապես, ռուսական զենք են գնում հետխորհրդային գրեթե բոլոր երկրները (բացի Վրաստանից և Ուկրաինայից), այդ թվում Հայաստանի հակառակորդ Ադրբեջանը:
Սակայն սպառնալիքը, կարծես թե, առավել մեծ արձագանք գտավ, հենց Հայաստանում, որը մեծապես հենվում է ռուսական զենքի վրա, բայց և ցանկանում է լավ հարաբերություններ պահպանել ԱՄՆ-ի հետ, գրում է Կուչերան:
Ստոկհոլմի խաղաղության հետազոտության միջազգային ինստիտուտի ավագ փորձագետ Սիեմոն Վեցեմանը կարծում է, որ այդ մասշտաբները դժվարացնում են պատժամիջոցների կիրառումը:
«Վստահ չեմ, թե ինչպես է դա աշխատելու, բայց պետք է դա լինի շատ ընտրովի, դեպքից դեպք սկզբունքով՝ ինչ պարագայում ԱՄՆ-ը կարող է որոշում կայացնել պատժամիջոցներ սահմանել ռուսական զենք ձեռք բերելու համար: Բայց, ամենայն հավանականությամբ, դա կլինի այնպիսի երկիր, որի հետ ԱՄՆ-ը արդեն խնդիրներ ունի, – ասել է Վեցեմանը Eurasianet.org- ի հետ հեռախոսազրույցում: -Այնպես որ, ո՛չ նրա ռազմավարական գործընկերները, ոչ մոտ դաշնակիցները, ո՛չ անգամ հեռու դաշնակիցները չեն լինի այդ շարքում, եթե նրանց հետաքրքրության շրջանակում չլինեն, ուստի Հայաստանը, հավանաբար, ապահով կլինի»:
Արտաքին հարաբերությունների վերլուծաբան Սուրեն Սարգսյանը կարծում է, որ Հայաստանը կարող է ապահով լինել, քանի որ Վաշինգտոնում հասկանում են նրա բարդ աշխարհաքաղաքական իրավիճակը: «Դա նման է այն իրավիճակին, երբ Իրանը միջազգային պատժամիջոցների տակ էր, եւ ԱՄՆ-ն աչք փակեց Երեւանի եւ Թեհրանի համագործակցության բազմաթիվ կողմերի վրա՝ հասկանալով, որ Իրանը Հայաստանի համար արտաքին աշխարհի երկու միջանցքներից մեկն է, քանի որ այդ երկիրը շրջափակված է Ադրբեջանի եւ Թուրքիայի կողմից», – ասել է նա EADaily- ին:
Այնուամենայնիվ, այս անորոշությունը ստիպում է կողմերին գոնե մտածել Ռուսաստանի հետ իրենց գործարքների մասին: «Նախագահը կարող է պատժամիջոցներ սահմանել ցանկացած մեկի վրա, ով զենք է գնում Ռուսաստանից», – Eurasianet-ի հետ զրույցում ասել է Փենսիլվանիայի համալսարանում հետխորհրդային արտաքին հարաբերությունների գծով փորձագետ Միտչել Օրենշտեյնը: – Թրամփը դեռեւս նման պատժամիջոցներ չի կիրառել, եւ դա կասկածներ է առաջացնում ԱՄՆ դաշնակիցների եւ մյուսների մոտ՝ ինչպիսին կարող է լինել Թրամփի քաղաքականությունը: Դա դժվար է հասկանալ»:
Պատրաստեց՝ Վիկտորյա ԱՆԴՐԵԱՍՅԱՆԸ
