2017-ին ՀՀ-ում կոռուպցիայի ընկալման համաթիվը անցյալ տարվա 33-ի փոխարեն դարձել է 35: Սակայն ըստ ԹԻՀԿ ծրագրերի ղեկավար Վարուժան Հոկտանյանի՝ սա չի նշանակում, որ կոռուպցիայի նվազում կա:
Նշենք, որ 2017-ին Հայաստանը 180 երկրների շարքում 107-րդ տեղում է՝ 35 միավորով, անցյալ տարի՝ 33 միավորով 176 երկրների շարքում 113-ն էր:
«Մեդիա կենտրոնում» «Կոռուպցիայի ընկալման համաթիվը 2017-ին. իրավիճակը Հայաստանում» թեմայով հրավիրված քննարկմանը պարոն Հոկտանյանը պարզաբանեց. «եթե Հայաստանի միավորը դառնար 37 կամ 39, այդ դեպքում կարող էինք ասել, որ բարելավում է եղել: Կամ եթե 33-ից իջներ 29, կասեինք վատթարացում է եղել, բայց եթե 30 իջներ, չէինք ասի, որ վատթարացում է եղել: Ուսումնասիրությունները ցույց են տալիս, որ եթե համաթիվը 50-ից ներքև է, կոռուպցիան այդ երկրում լուրջ խնդիր է: Որպես կանոն՝ այդ երկրներում կոռուպցիան լրջորեն խանգարում է զարգացմանը»:
Հիշեցմանը՝ ժամանակին պարոն Հոկտանյանն ասում էր՝ ճահճացման վիճակում ենք, հիմա իրավիճակը նո՞ւյնն է, պարոն Հոկտանյանը պատասխանեց. «Ճահճացումը շարունակվում է»:
Հարցին՝ ինչպիսի՞ն է ՀՀ պաշտոնատար անձանց դիրքորոշումն այս հարցում, պարոն Հոկտանյանը պատասխանեց. «Մեր կազմակերպությունը կոռուպցիայի դեմ պայքարի խորհրդի անդամ է: Հարցերը բարձրացվում են, մոտեցումն է այն, որ անցյալ տարվա խորհրդարանական ընտրություններից հետո օրենսդրական քայլեր արվում են՝ ապրիլից կոռուպցիայի կանխարգելման հանձնաժողով կստեղծվի, բայց այստեղ խնդիրը կիրարկման մեջ է: Օրենքներից անցում չկատարելը կիրարկման և սողանցքներ թողնելը ցուցիչ է քաղաքական կամքի բացակայության մասին»:
Վարուժան Հոկտանյանն այս առիթով բերեց ավտորիտար Սինգապուրի ու Հոնկոնգի օրինակը. «Այս ավտորիտար երկրներն ունեն ազատական տնտեսություն: Այդ ազատականին հասնելու համար հասկացան, որ պետք նվազեցվի կոռուպցիան, հակառակ դեքում կունենանք լուրջ խնդիրներ: Այլ խնդիր կա, եթե ունես ազատական տնտեսություն, որպես կանոն ունես նաև ժողովրդավարական համակարգ: Ավտորիտար քաղաքական համակարգ և ազատական տնտեսություն ունեցող երկրները անոմալիա են: Մենք կլինե՞նք այդ անոմալիան, չեմ կարծում. մենք Սինգապուր չենք»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
