«Չհասկացվեց`գործատուն ո՞վ է`անհատ ձեռներեցնե՞րը, խոշոր ՍՊԸ ունեցողնե՞րը, խոշոր հիմնադրամնե՞րը: Ի՞նչ մեխանիզմով են նրանք հայտնվելու բուհում: Բուհե՞րն են խնդրելու որ գան, թե՞ իրենք են գնալու Բուհին եւ խնդրեն` դառնալ խորհրդի անդամ`այն էլ 30 տոկոսով: Այսինքն, գործատուներին ենք տալու հոգաբարձուների խորհրդի կառավարումը, քանի որ գործատուն ընտրվելու է հոգաբարձուների խորհրդի նախագահ»,- այս հարցն այսօր ՀՀ կրթության եւ գիտության նախարար Լեւոն Մկրտչյանին ուղղեց ԱԺ համանուն հանձնաժողովի փոխնախագահ, ՀՀԿ-ական պատգամավոր Կարեն Ավագյանը:
Մինչ այդ բուհերի կառավարման խորհուրդներում գործատուների ներկայության մասին խոսել էր նաեւ Երեւանի ավագանու «Ելք» խմբակցության անդամ Արայիկ Հարությունյանը:
Հիշեցնենք, որ խորհրդարանում լսումներ են ընթանում «Բարձրագույն կրթության ոլորտի օրենսդրական բարեփոխումներն ու հիմնախնդիրները» թեմայով:
«Խնդիրը հայացքի մեջ է»,- փորձեց մանրամասնել Լեւոն Մկրտչյանը: «Եթե համալսարանին վստահում ենք, ինքնուրույն է, ազատ է, մենք էլ ասում ենք պետությունը չպիտի համալսարանին թելադրի, ասում ենք, թող քո տիրույթի 30 տոկոսը լինեն մարդիկ, որոնք բիզնեսից են եւ ինչ-որ ձեւով քեզ կօգնեն: Ի՞նչ սկզբունքով է համալսարանն ընտրում`հավատարմագրման փուլում դա կերեւա: Գործատուի չափանիշները չենք կարող սահմանել: Կարող է մեկը ՀԿ-ի ղեկավար է, գործատու է, բայց գործատուները նրա տեղն էլ չգիտեն»,-ասաց նախարարը:
Կարեն Ավագյանին նաեւ հետաքրքրում էր՝ ինչո՞ւ ռեկտորին չի արգելվում ղեկավարել գիտխորհուրդը: Միջազգային փորձից օրինակ բերեց, որ հոգաբարձուների խորհրդի նախագահն էլ կապ չունի ռեկտորատի եւ գիտխորհրդի հետ:
«Համալսարանն իր կանոնադրությամբ թող որոշի, մենք օրենքում չենք գրել»,- պատասխանեց նախարարը`նկատելով, որ այսօրվա գիտխորհուրդների մասով պատգամավորը ճիշտ է, բայց երբ ասում ենք, որ գիտխորհուրդն ակադեմիական խնդիրներով է զբաղվելու, այլ է դառնում. «Կառավարման ֆունկցիաները ամբողջությամբ կառավարման խորհուրդ ենք տեղափոխում»:
Նախարարը հավելեց նաեւ, որ ինստիտուցիոնալ հավատարմագրման փոխարեն, օրենքով նշել են, որ բուհերը պետք է անցնեն մասնագիտական հավատարմագրման:
Նելլի ԳՐԻԳՈՐՅԱՆ
