Բուհերի կառավարման խորհուրդներում «Բարձրագույն կրթության մասին» ՀՀ օրենքի նոր նախագծով որեւէ պաշտոնյա ղեկավար անձ չի լինելու:
«Չի կարող համալսարանը լինել քաղաքականացված, այն կարող է լինել խիստ մատչելի ու բաց աշխարհի համար, խիստ մշակութային կամ գիտական, բայց քաղաքականացված, քաղաքական ուժերի ազդեցության տակ չի կարող լինել»,- այսօր «Հայելի» ակումբում «Բարձրագույն կրթության մասին» ՀՀ օրենքի նոր նախագծին անդրադառնալով՝ ասաց «Հայբուսակ» համալսարանի ռեկտոր Անահիտ Հարությունյանը:
Նրա կարծիքով, թեեւ գործող օրենքն էլ վատը չէր, բայց նոր օրենքը շատ ավելի օգտակար կլինի, այն պարտադրված է միջազգային պայմանագրերով. «Առաջարկվող փոփոխություններն էական են, հուսով եմ՝ դրանք կրթողների ու կրթվողների շահերին կծառայեն: Այն համահունչ է եվրոպական կրթական տարածքում գործող օրենքներին»:
Իսկ ինչ է նախատեսում նոր օրենքը, տիկին Հարությունյանի մեկնաբանմամբ. «Ասպիրանտուրային տալիս է բովանդակային իմաստ, մեզ մոտ էլ եւս գիտական թեզերը կպաշտպանեն երրորդ կրթական փուլում, կպաշտպանեն մեկ գիտական թեզ ու կստանան մեկ գիտական աստիճան: Մինչդեռ երբ բոլոնյան հռչակագիրը ստորագրեցինք ու մտանք այդ գործընթացի մեջ, ՀՀ-ում գործում էր երկու աստիճան՝ թեկնածու, դոկտոր»:
Ըստ բանախոսի՝ օրենքում բոլոր փոփոխությունները ՀՀ կրթական վկայականներն ու դիպլոմները դրսում ավելի ճանաչելի դարձնելուն են միտված:
Նոր օրենքը նախատեսում է նաեւ նախաբակալավրիական կրթություն:
«Այն օգուտ է կրթվողներին, որովհետեւ հնարավոր է, որ մարդը չկարողանա ինչ-ինչ պատճառներով ավարտել բուհը ու կիսատ թողնել ուսումը, բայց նա ձեռնունայն չի գնա համալսարանից, կստանա ինչ-որ աստիճան: Նախաբակալավրիական կրթությունը մեկուկես տարի տեւողությամբ է լինելու»:
Տիկին Հարությունյանը նաեւ բացթողում է արձանագրել օրենքի նախագծում, դրանցից առանձնացրեց կարեւորը. «Օրենքի նախագծում չի տրված բարձրագույն կրթության սուբյեկտների տեսակները, տարբերակված չեն ինստիտուտներն ու համալսարանները, կոնսերվատորիա եւ այլն, դա մեծ բաց է ու շարունակելու է այն ազդել մեր բարձրագույն կրթության վրա, մինչդեռ դա անհրաժեշտ է»:
Արփինե ՍԻՄՈՆՅԱՆ
