Մարզիչ Սեյրան Հարությունյանի հետ դահուկորդը փորձում է առավելագույն չափով ծանոթանալ մրցուղուն, որը բավականաչափ դժվարանցանելի է;
Փհենչհանում գտնվող մեր գործընկերներ, մարզական լրագրող Խաչիկ Չախոյանը եւ ֆոտոլրագրող Ասատուր Եսայանցը Aravot.am-ին տեղեկացրին նաեւ հետեւյալը:
«Նախ նշենք, որ մի քանի օր առաջ հայկական կայքերում բուռն քննարկումների գործող անձ դարձած լեռնադահուկորդն առաջին անգամ չէ, որ մարզվում է այստեղ: Առաջին երեք մարզումներից հետո դահուկներից մեկի վնասվելուց հետո, այլ ոչ թե կոտրվելուց, ինչպես նշում էին հայկական կայքերը, հայ լեռնադահուկորդը չէր մարզվում: Հիմա արդեն այդ խնդիրը լուծված է և Աշոտ Կարապետյանը նոր դահուկներով ու համապատասխան մարզակոշիկներով վերսկսել է մարզումները:
Եվ մարզիկը և մարզիչը նշեցին, որ ամեն ինչ կանեն բարձր արդյունք ցույց տալու համար: Բայց դրան հասնելը շատ դժվար կլինի: Մասնավորապես Աշոտ Կարապետյանն ասաց. «Հիմա ես ոչ մի խնդիր չունեմ մարզագույքի հետ կապված ու արդեն կենտրոնացել եմ մարզումների վրա: Մարզչի հետ պետք է ուսումնասիրենք դահուկուղու գրեթե ամեն սանտիմետրը, որովհետև շատ բարդ մրցուղի է: Ձյունը արհեստական է, մրցուղին՝ սառցակալած, ինչը շատ է բարդացնում դահուկորդի գործը:
Համեմատելու համար ասեմ, որ Ծաղկաձորում բնական ձյուն է եւ կարելի է ասել՝ «փափուկ» մրցուղի, իսկ այստեղ լրիվ հակառակն է: Ինչեւէ, մարզիկն ու մարզիչը խոստանում են անել ամեն բան հնարավորինս բարձր արդյունք ցույց տալու համար», – մեզ փոխանցեցին մեր գործընկերները:
Փետրվարի 22-ին Աշոտ Կարապետյանը հանդես է գալու ոլորավայրեջք: Մինչեւ մեկնարկը մարզիկը բաց թողած մի քանի օրը լրացնելու գրեթե մեկ շաբաթ ունի:
Աշոտ ՀԱԿՈԲՅԱՆ
Լուսանկարը՝ armenpress-ի
