Հայաստանի գրողների միությունում (ՀԳՄ) փետրվարի 16-ին անդրադարձ եղավ Հայաստանում ստեղծվող գրականությանը: Գրողների միության նախագահ Էդվարդ Միլիտոնյանը նշեց, որ մանկապատանեկան գրականությունն այսօր պահանջված է աշխարհում եւ ամենաշատն է թարգմանվում, սակայն նրա խոսքով, պատանեկան տարիքի ընթերցողների համար այդքան գրականություն առանձնապես չկա:
Մանրամասներ` տեսանյութում`
Միաժամանակ, Գրողների միության նախագահը հավաստիացնում է. «Այսօր ժամանակակից լուրջ գրականություն կա` արձակ, պոեզիա, դրամատուրգիա…Վերջերս, արդեն մի քանի տարի է՝ չեմ լսում, որ լրագրողը գա ու քամահրանքով հարց տա` արդյոք մենք ունե՞նք ժամանակակից գրականություն…»: ՀԳՄ նախագահի խոսքով, լրագրողներն ու ընթերցողներն արդեն սկսել են ավելի սթափ հայացքով դիտարկել այսօր ստեղծվող գրականությունը եւ այլ աչքով նայել իրենց կողքին ապրող գրողներին:
Մանրամասները` տեսանյութում
Նա նաեւ նեղսրտեց, որ հայ գրականություն ասելիս, չգիտես ինչու, միայն Չարենցին ու մի քանի այլ հայ դասականի են պատկերացնում` մոռանալով հայ գրականության պատմության մեջ լուրջ ավանդ ունեցող այլ հեղինակների:
Էդվարդ Միլիտոնյանն ասում է, որ յուրաքանչյուր գրող առանձնահատուկ է եւ տարբեր, հետեւաբար չպետք է բոլորին «մեկ արշինով չափել». «Որեւէ հայ գրող գրելո՞ւ է այլ ձեւով, քան ասենք, Խաչիկը Դաշտենցը, այնպես, ինչպես ինքն է գրել «Ռանչպարների կանչը»… այսինքն՝ ինքնատիպության վերակերտման կնիք կա, որ չպետք է միայն Չարենցին վերագրել ու ասել` վերջ, Չարենցից հետո փակեցինք, պրծավ…Չարենցից հետո ապրել է, օրինակ, Գուրգեն Մահարի, իսկ նրա «Ծաղկած փշալարերը» հիրավի համաշխարհային գրականության նմուշ է…»:
Մանրամասները` տեսանյութում:
Հավելենք, որ Հայաստանի գրողների միությունը պատվոգրեր հանձնեց տարբեր լրատվամիջոցների, այդ թվում «Առավոտին»` հայ գրականությանը պարբերաբար անդրադառնալու եւ ՀԳՄ աշխատանքը լուսաբանելու համար:
Գոհար ՀԱԿՈԲՅԱՆ
