Շիրակի մարզի բնակիչ, ծննդով Տավուշի մարզի Մովսես գյուղից կինն իր ամուսնու հետ Մովսես, հորական տուն գնալով, իրենց հարեւանի ոչխարներին տիրանալու միտք է հղացել: Կնոջը մեղադրանք է առաջադրվել այն բանի համար, որ նա 2017թ. դեկտեմբերի 27-ին, ժամը 19-ի սահմաններում ուրիշի գույքի զգալի չափերով գաղտնի հափշտակություն կատարելու դիտավորությամբ, դարպասի դռնակը բացելու միջոցով ապօրինի մուտք է գործել Մովսես գյուղի բնակիչ Վաչագան Գրիգորյանին պատկանող ցանկապատված տարածք, այնուհետեւ նույն եղանակով բացել պահեստարան հանդիսացող անասնագոմի դուռը եւ այնտեղից գաղտնի հափշտակել վերջինիս պատկանող 5 ոչխարը, պատճառելով 200 հազար դրամի վնաս:
Կինն փորձել է ամուսնու «Ժիգուլի» ավտոմեքենայով ոչխարները տեղափոխել իր բնակության վայր, Շիրակի մարզի գյուղերից մեկը, սակայն Տավուշի մարզում, ավտոճանապարհին ոստիկանները նկատելով ավտոմեքենայում գտնվող ոչխարները, բացահայտել են գողությունը: Ընդ որում, կնոջ ամուսինը չի իմացել, որ ոչխարները գողացված են:
Կնոջը մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 3-րդ կետով (« Գողությունը, որը կատարվել է պահեստարան կամ շինություն ապօրինի մուտք գործելով»):
Նրա նկատմամբ խափանման միջոց է ընտրվել չհեռանալու մասին ստորագրությունը: Սույն քրեական գործով դատավարությունը Տավուշի մարզի առաջին ատյանի դատարանի Բերդի նստավայրում նշանակված է փետրվարի 22-ին:
Ոսկան ՍԱՐԳՍՅԱՆ
