Երեւանի քաղաքապետարանում տեղի ունեցած ծեծկռտուքի հետ կապված Երեւանի ավագանու «Ելք» խմբակցության ղեկավար Դավիթ Խաժակյանը հայտարարել էր, որ «Երկիր Ծիրանիի» կողմից ոչ ադեկվատ պահվածք է դրսեւորվել:
Այդ առնչությամբ լրագրողների հետ զրույցում ԱԺ «Ելք» խմբակցության ղեկավար Նիկոլ Փաշինյանն ասաց, որ միջադեպի մասին ինքն իր գնահատականն է տվել: Դիտարկմանը, որ դուք ԵԾ-ի պահվածքը խիզախություն եք որակել, իսկ Խաժակյանը դա որակել է շոու՝ Փաշինյանն արձագանքեց. «Ես այդ հայտարարությունը չեմ լսել, սովորություն չունեմ մեկնաբանել մի բան, որը չեմ լսել: Երեւանի ավագանու «Ելք» խմբակցությունն իր դիրքորոշումն արտահայտել է հայտարարությամբ եւ դատապարտել է ՀՀԿ-ի պահվածքը»:
Փաշինյանն ասաց, որ ՀՀԿ-ի անդամներն էլ, երբեմն, տարբեր կարծիքներ են հայտնում՝ կարեւոր հարցերի մասին, երբ սահմանադրական օրենքներ են քննարկում, կառավարությունն ու իր խորհրդարանական մեծամասնությունը չէր կարողանում կողմնորոշվել՝ դա սահմանադրակա՞ն օրենք է, թե՞ չէ: Նա ասաց, որ քաղաքականությունը քարացած չէ, տարբեր տեսակետներ կարող են լինել:
Լրագրողների դիտարկմանը, որ Դավիթ Խաժակյանի խոսքերից տպավորություն էր, որ նա Տարոն Մարգարյանի փաստաբանությունն է անում՝ Փաշինյանը հակադարձեց. «Դա սխալ տպավորություն է»:
Երբ ասացին, որ արխիվից հանվել են փաստաթղթեր, տեղեկություններ, ըստ որոնց Դավիթ Խաժակյանը Սերժ Սարգսյանից պարգեւ է ստացել՝ Նիկոլ Փաշինյանն արձագանքեց. «Դե հիմա արխիվից կարող են հանել, որ մեր խմբակցության էլի մարդիկ առնչություն են ունեցել, կամ արխիվից կարող են հանել, որ 2002 կամ 2001 թվին ես բարեւել եմ Սերժ Սարգսյանին, հետո՞ ինչ»:
Հարցին՝ բա հիմա՞ ինչու չեք բարեւում՝ նա պատասխանեց՝ «Չեմ հանդիպում»: Երբ ասացինք՝ կանչում է՝ չեք գնում՝ Փաշինյանը պատասխանեց. «Ինքը չի կարող ինձ կանչել»:
Հռիփսիմե ՋԵԲԵՋՅԱՆ
