Այսօր կառավարության նիստից հետո արտաքին գործերի փոխնախարար Շավարշ Քոչարյանը, պատասխանելով լրագրողների հարցերին եւ անդրադառնալով ԱՄՆ հետախուզական ծառայությունների հրապարակած զեկույցին, ըստ որի ԱՄՆ-ն չի բացառում, որ 2018-ին իրադրությունը Լեռնային Ղարաբաղում կարող է է՛լ ավելի սրվել, ասաց. «Այն հանգամանքը, որ պայթունավտանգ է իրավիճակը, բոլորիս համար ակնհայտ է: Դրա վկայությունն են 2016 թվականի ապրիլի դեպքերը»:
Քոչարյանն ասաց, որ հայկական կողմերը միշտ պատրաստ են ցանկացած զարգացումների: Քոչարյանի խոսքերով՝ «Ինչ վերաբերում է պատրաստ լինելուն, ապա ինչի՞ մասին է խոսքը: Բավական է հիշատակել Ադրբեջանի նախագահի վերջին ելույթը, որը միանշանակ ցույց է տալիս՝ ով ինչի է պատրաստ, ով պատրաստ չէ բանակցային գործընթացում առաջ գնալուն: Ալիեւն իր ելույթով, նրանց համար, ովքեր դա դեռ չեն ընկալել, փայլուն ձեւով, անհերքելի ապացուցեց` երբեւիցե չի կարող Ղարաբաղը լինել Ադրբեջանի կազմում, եւ, որ Արցախի Հանրապետության միջազգային ճանաչումն անխուսափելի է»:
Մանրամասն՝ տեսանյութում
Նելլի ԲԱԲԱՅԱՆ
