ԱՄՆ ֆինանսների նախարարության, այսպես կոչված, «Կրեմլյան զեկույցում», ինչպես հայտնի է, թվարկված են Ռուսաստանի նախագահ Վլադիմիր Պուտինին մոտ կանգնած մարդկանց անունները, այդ թվում նաեւ «Տաշիր» ընկերությունների խմբի ղեկավար Սամվել Կարապետյանինը: Արդյո՞ք այս պատժամիջոցները կազդեն Հայաստանի վրա, եւ արդյոք սա ինչ-որ ակնարկ է: Այսօր կառավարության նիստից հետո լրագրողներն այս հարցն ուղղեցին արտաքին գործերի փոխնախարար Շավարշ Քոչարյանին: «Եկեք ճշտենք, մամուլը մի բան է, ԱՄՆ-ի ցուցակը՝ մեկ այլ բան: Իմ տեղեկություններով, այդ անձը չկա ցուցակում»,-Քոչարյանն այսպես արձագանքեց հարցին:
Արդյոք ՀՀ կառավարությունը մտադի՞ր է քննարկել պատժամիջոցների հարցը, որպեսզի Հայաստանը զերծ մնա այդ պատժամիջոցներից, այս հարցին էլ Քոչարյանը պատասխանեց. «Ամեն դեպքում, մենք պետք է հաշվի առնենք բոլոր զարգացումները, որոնք առկա են: Կոնկրետ ինֆորմացիա պետք է լինի: Իմ գնահատականներով՝ այն հարցը, որը հնչեց, չի համապատասխանում իրականությանը: Չափազանցվում է այն վտանգը, որ կա, բայց դա չի նշանակում, որ պետք է անուշադրության մատնենք, պետք է անընդհատ հետեւել»:
Քոչարյանը վստահեցրեց՝ «Չկա այդպիսի կոնկրետ հարց, որը հասունացած է, որը պահանջի թե՛ ռուսական եւ թե՛ ամերիկյան կողմի հետ բանակցություններ»:
Նելլի ԲԱԲԱՅԱՆ
