Անցյալ դարի 80-ական թվականներին մասնակի վերանորոգած Վայոց ձորի մարզի Հերհեր գյուղի ճանապարհը կվերանորոգվի: Այս լուրն արդեն քանի ամիս է՝ հերհերցիների քննարկման առարկան է: Չեն հավատում: Ասում են` մինչեւ աչքներովս չտեսնենք, չենք հավատա: Հերհերի բնակիչները տասնյակ անգամներ լսել են ճանապարհը վերանորոգելու մասին խոստումներ, հատկապես դրանք տրվել են ընտրությունից ընտրություն, երբ գյուղացիներից ձայներ կորզելու դիմաց պատգամավորի թեկնածուներն ու կուսակցությունները ճանապարհի հարցն էլ են շահարկել` խոստանալով այն վերանորոգել: Սակայն ընտրվելուց հետո հերհերցիների պահանջին ի պատասխան ասել են` դրա համար մեծ գումարներ են պետք:
Հերհերը Վայք քաղաքից ընդամենը 18 կմ հեռավորության վրա է գտնվում, սակայն տեղանքին ծանոթ «տաքսիստները» նույնիսկ 5-6 հազար դրամով չեն ցանկանում քեզ Վայքից Հերհեր հասցնել, ասում են` մի 50 հազար էլ պետք է դնենք, որ ավտոմեքենայի վնասված պահեստամասերը գնենք:
Ճանապարհի ասֆալտե ծածկույթը քայքայված է, ողջ երկայնքով գրեթե բացակայում են պաշտպանիչ եզրաշերտերը: Ճանապարհի մի մեծ հատված անցնում է Հերհերի ջրամբարի առափնյա հատվածով, որտեղով երթեւեկելն առավել վտանգավոր է: Վերջին մի քանի տարում ճանապարհին պարբերաբար քարաթափումներ են լինում` փակելով երթեւեկելի հատվածը:
Հերհերի ճանապարհն այս մարզի մեկ այլ՝ Կարմրաշեն գյուղն է սպասարկում, որի շարունակությունը նույնպես անմխիթար վիճակում է: Երկու գյուղը միասին ունեն 1000-ից ավելի բնակիչ: Այս երկու գյուղերի բնակիչները փաստի առաջ են կանգնում հատկապես այգեգործության սեզոնին, երբ, նրանց խոսքերով ասած` բերքը ծառին փչանում էր, բայց չեն կարողացել այդ ճանապարհով վաճառքի տանել:
Ճանապարհի վիճակը փոքր-ինչ թեթեւացնելու համար գյուղացիների միջոցներով տոննաներով ավազ ու հող է լցվել, որը, սակայն, ընդամենը մի քանի օր է դիմացել, քամիներն ու անձրեւները դրանք ցրիվ են տվել:
Ճանապարհի վերանորոգման մասին հերհերցիների լսած լուրերը «Առավոտի» հետ զրույցում հաստատեցին տրանսպորտի, կապի եւ տեղեկատվական տեխնոլոգիաների նախարարությունից:
Նախարարի մամուլի քարտուղար Անահիտ Առաքելյանը մեր հարցերին ի պատասխան՝ ասաց, որ նշյալ` Մ-2 Կարմրաշեն, ճանապարհի շինարարության մրցույթում հաղթող է ճանաչվել «Բլեսկ» ընկերությունը: Ըստ նույն աղբյուրի՝ կվերանորոգվի 10 կմ 900 մետր երկարությամբ ճանապարհահատվածը: Շինարարության մեկնարկն էլ կտրվի այս տարվա մարտի 1-ին` եթե եղանակային պայմանները չխոչընդոտեն: Պայմանագրով նախատեսված է շինարարական աշխատանքներն ավարտել 11 ամսում: Ծրագրի արժեքը մեկ միլիարդ 275 միլիոն դրամ է: Շինարարությունն իրականացվում է «Կենսական նշանակության բարելավում» ծրագրի շրջանակներում, որը գյուղական համայնքների համար նախատեսված ծրագիր է եւ իրականացվում է Համաշխարհային բանկի ֆինանսավորմամբ:
Նախարարությունից հետաքրքրվել էինք նաեւ շինարարության ընթացքից` ճանապարհն ամբողջությա՞մբ է փակվելու:
Հերհերցիները մեզ հետ զրույցում մտահոգություն էին հայտնել, որ վերանորոգման նպատակով ճանապարհը փակվելու դեպքում Վայք հասնելու համար պետք է օգտվեն շրջանցիկ ճանապարհից, որը մի քանի կիլոմետր ավելի է եւ շատ ավելի վատ վիճակում: Նախարարությունից այս առնչությամբ էլ հայտնեցին, որ ճանապարհը չի փակվելու, եւ շինաշխատանքները կազմակերպվելու են այնպես, որ հնարավորինս քիչ անհարմարություն պատճառվի երթեւեկության մասնակիցներին: Համաձայն աշխատանքների պլանի՝ ճանապարհը կփակվի հատվածաբար. մի կողմը փակելու դեպքում մյուս կողմը երթեւեկության համար բաց կլինի:
ԼՈՒՍԻՆԵ ԲՈՒԴԱՂՅԱՆ
«Առավոտ»
14.02.2018
