«Նուբարաշեն» ՔԿՀ-ի հարեւան շենքերից մեկի բնակիչ Լաուրա Համբարձումյանը «Երկիր Ծիրանի» խմբակցության ավագանու անդամ Մարինա Խաչատրյանի կողմից կոյուղաջուրն ավագանու նիստին տանելու միտքը դրական է գնահատում, բայց այն, թե ինչպես վարվեցին Խաչատրյանի հետ ՀՀԿ-ական տղամարդ-ավագանիները, իր համար անընդունելի է: «Գուցե «Երկիր Ծիրանին» այդ ամենը սիրուն չներկայացրեց, բայց երեւի մտածել են, որ կիրթ ներկայացնելը չի ընդունվի, դրա համար էլ տարան՝ կեղտաջուրը դրեցին դեմները…»,-Aravot.am-ի հետ զրույցում ասում է Լաուրա Համբարձումյանը:
Թե ինչպես ավագանու ՀՀԿ-ական անդամները չեզոքացրին Մարինա Խաչատրյանին, տիկին Լաուրան ամոթալի է համարում. «Կին տեսան՝ բռնին-տփին…տղամարդ են, բա կարելի՞ էր այդպես վարվել… պետք է գլխներին լցնեին այդ կեղտաջուրը, որ իմանային…»:
Նուբարաշենի բնակիչը դժգոհ է նաեւ ՀՀԿ-ական ավագանի Ալինա Քուշկյանի՝ միջադեպի առնչությամբ արած մեկնաբանություններից: «Թող մի հատ գա այստեղի ջուրը տանի-անալիզ անի, նոր ելույթ ունենա… դա թույն է, դրա համար ենք բարձրաձայնում՝ լուծում տվեք»,-ասում է տիկին Լաուրան:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
