Այս պահին Երեւանի քաղաքապետարանում ավագանու նիստը շարունակվում է: Օրակարգի 6-րդ հարցը բավականին բուռն արձագանքներ առաջացրեց, քանի որ առնչվում է Արամի եւ Նալբանդյան փողոցների հատվածում Արամ Մանուկյանի հուշարձանի տեղադրմանը համաձայնություն տալուն: Երեւանի ավագանու «Ելք» խմբակցության անդամ Արայիկ Հարությունյանը, պատասխանելով այն մեղադրանքներին, թե իրավունք չուներ արձանի էսքիզը տարածել, ասաց, որ դա օրենքի պահանջն է եղել հանրությանը ներկայացնելը, որպեսզի կարծիք հայտնեն: Ապա ասաց, որ «Ելքը» դեմ է այդ նախագծին:
Արայիկ Հարությունյանը քաղաքային իշխանություններին կոչ արեց հուշարձան տեղադրելու փոխարեն Արամ Մանուկյանի տունը վերանորոգել, որն այսօր քանդված եւ ավերակ վիճակում է: Ի պատասխան` նիստը վարող Երեւանի քաղաքապետ Տարոն Մարգարյանը ասաց, որ Արամ Մանուկյանի տունը սեփականություն է եւ քաղաքապետարանը նման լիազորություն չունի. «Եթե ունենայինք՝ կանեինք, իսկ հուշարձաններ տեղադրելու լիազորություններ ունի»: Արամ Մանուկյանի արձանի տեղադրմանը «Ելքը» դեմ քվեարկեց: «Երկիր ծիրանին» ընդհանրապես չմասնակցեց քվեարկությանը, ՀՀԿ-ն էլ 43 ձայնով կողմ էր արձանի տեղադրմանը: Արամ Մանուկյանի արձանը տեղադրելու նախագիծն անցավ:
Լուսինե ԲՈՒԴԱՂՅԱՆ
