«Արցախյան հակամարտության կարգավորմամբ լրջորեն չեն զբաղվում , այլ աշխատում են սահմանին ուժի կիրառումը բացառելու ուղղությամբ»,-«Տեսակետ» մամուլի ակումբում այսօր անդրադառնալով ԵԱՀԿ Մինսկի խմբի համանախագահների տարածաշրջանային այցին, ասաց քաղաքագետ Ալեքսանդր Իսկանդարյանը: Նա կարծում է, որ առաջիկա տարում եւս հակամարտության կարգավորման ուղղությամբ էական փոփոխությունների սպասել պետք չէ:
Մեկնաբանելով այն փաստը, որ հունվարին Կրակովում ՀՀ եւ Ադրբեջանի արտգործնախարարների հանդիպմանը պայմանավորվածություն ձեռք բերվեց շփման գծում յոթով ավելացնել դիտորդների թիվը, Իսկանդարյանը նշեց. «Չեմ կարծում, որ իրավիճակը կարող է լրջորեն փոխվել դիտորդների թվի ավելացմամբ: Ի սկզբանե պետք էր խոսել այնպիսի քանակության մասին, որը թույլ կտար հետաքննություն կատարելու ուղղությամբ քայլեր ձեռնարկել: Բացի այդ, Ադրբեջանը խոչընդոտելու է շփման գծում դիտորդների թվի ավելացմանը»:
Քաղաքագետի խոսքով՝ բոլորի համար էլ պարզ է, թե շփման գծում որ կողմն է կրակում եւ ինչու. «Իսկ Ադրբեջանին ճնշելու գործիքներ չկան՝ ոչ քաղաքական, ոչ տնտեսական»:
Լուիզա ՍՈՒՔԻԱՍՅԱՆ
