– Տիկին Զոհրաբյան, «Ծառուկյան» խմբակցությունը ՀՀԿ-ի նախագահի թեկնածու Արմեն Սարգսյանին հանդիպելուց հետո պետք է որոշում կայացներ, թե ինչպե՞ս է քվեարկելու։ Արդեն ունե՞ք այդ որոշումը։
– Եթե Արմեն Սարգսյանն ինքը դեռ վերջնական որոշում չունի՝ ընդունո՞ւմ է ՀՀԿ-ի առաջարկը` առաջադրվելու նախագահի թեկնածու, թե՝ ոչ, մենք ի՞նչ որոշում պիտի կայացնենք։ Այո, խմբակցությունը հանդիպել է Արմեն Սարգսյանին, եւ մենք տվել ենք մեզ հետաքրքրող բոլոր հարցերը, լսել ենք երկրի զարգացման իր տեսլականը եւ միմյանց հրաժեշտ ենք տվել։ Այն պահին, երբ ինքը կհայտարարի, որ պատրաստ է առաջադրվել նախագահի թեկնածու, բնականաբար, Գագիկ Ծառուկյանը կհավաքի խմբակցության նիստ, մենք կներկայացնենք մեր տպավորություններն ու դիտարկումները եւ կկայացնենք որոշում։ Այս պահին որոշում կայացնելու հրատապություն ուղղակի չեմ տեսնում։
– Իսկ դուք վստահ չե՞ք, որ Արմեն Սարգսյանը չի մերժելու Սերժ Սարգսյանի առաջարկը։
– Կապ չունի՝ ես վստահ եմ, թե՝ ոչ։ Քանի դեռ քաղաքացի Արմեն Սարգսյանը չի հայտարարել, որ ինքը պատրաստ է դառնալ նախագահի թեկնածու Արմեն Սարգսյան, ցանկացած խոսակցություն այս փուլում անիմաստ է։
– Տիկին Զոհրաբյան, այսօր մամուլում հրապարակում կար, որ «Ծառուկյան» դաշինքի որոշ պատգամավորներ Քրիստոսի տանջանքների հետ են համեմատել այն առաքելությունը, որը պիտի ստանձնի Արմեն Սարգսյանը եւ ներբողներ են ձոնել նրան։
– Դա լկտի եւ էժանագին սուտ է։ Մեր պատգամավորները բավականին լուրջ եւ սուր հարցադրումներ են ուղղել Արմեն Սարգսյանին եւ փորձել են ստանալ պատասխաններ՝ երկիրը այս տոտալ փակուղուց դուրս բերելու իր մոտեցումները հասկանալու համար։ Այսքանը։ Ձոներ եւ ներբողներ չեն եղել, եւ ես չեմ կարծում, որ իմաստ ունի ամեն մի պարապ տխմարություն մեկնաբանել։
Զրույցը`Նելլի ԳՐԻԳՈՐՅԱՆԻ
