«Երկիր Ծիրանի» կուսակցության ղեկավար Զարուհի Փոստանջյանն այսօր Լոռու մարզում էր: Վերջինս շրջելով Վանաձորի փողոցներում հայտարարում էր, որ այսուհետ ոչ մի հայ չպետք է հանդուրժի Հայաստանում տիրող ապօրինությունները: Նա հորդորեց, որ պետք է բոլորով միահամուռ ձեւով ընդվզեն. «Բոլորս միասին պետք է ձեռք ձեռքի բռնած ելնենք փողոցներ, լցնենք մեր փողոցներն ու հրապարակները եւ տապալենք Հայաստանում գործող ապօրինի իշխանությունը: Ձեզ ուղերձ ենք հղում, որպեսզի դուք այլեւս չշարունակեք ապրել այս սատանայի բանաձեւի ներքո եւ չլսեք դժոխքի երաժշտությունը, որն այսօր հնչում է ՀՀ-ում»:
Փոստանջյանը կուսակիցների հետ Հայքի հրապարակից քայլելով շարժվեց դեպի հագուստի շուկա: Ճանապարհին նրանց միացան մի քանի վանաձորցիներ: Նա իր ընդվզման կոչը հնչեցրեց նաեւ հավաքվածների համար: Ապա, ցույց տալով «Դժոխքի երաժշտություն Հայաստանում. Ընդվզի՛ր, մերժի՛ր սատանայի բանաձևը» վերտառությամբ ցուցապաստառն ընդգծեց. «Նկարն ունի շուրջ 500 տարվա պատմություն, եւ նկարում այս բոլոր պատկերները, որ դուք տեսնում եք, կարող ենք տեսնել մեր այսօրվա բռնազավթված իշխանության մեջ: Սա այն սատանան է, որն անընդհատ ցանկանում է զավթել իշխանությունը, եւ ստրկացնել, կուլ տալ մարդկանց, խմել նրանց արյունը: Դարեր շարունակ դա եղել է»:
Փոստանջյանն ասում է, որ առաջիկա 2 ամիսները կարեւոր են հայ ազգի ու պետականության համար: Իսկ ընդվզումը պետք է լինի համատարած եւ պետք է ներառի ոչ միայն ՀՀ-ն, այլ նաեւ Սփյուռքը. «Մեր քաղաքացիները ոչ թե վախեցած են, այլ կոպիտ չհնչի՝ ավելի շատ բթացած են: Եւ հենց այնպես չենք պաստառի վրա ցույց տալիս այս ականջը, մեր ականջը, որ կտրել են»:
Մանրամասները՝ տեսանյութերում
Տաթեւիկ ՂԱԶԱՐՅԱՆ
