Ինչպես տեղեկացրել ենք, նախագահի թեկնածու Արմեն Սարգսյանը քիչ առաջ «Ելք» խմբակցության անդամների հետ հանդիպումից հետո պատասխանեց լրագրողների հարցերին:
Լրագրողները հարցրեցին՝ քաղբանտարկյալներ Հայաստանում կա՞ն: Նա պատասխանեց. «Ես չգիտեմ՝ քաղբանտարկյալ կա՞: Ես գիտեմ, կան անհատներ, որոնք գնահատվում են հասարակության կողմից՝ որպես քաղբանտարկյալ: Ես գիտեմ միջազգային տարբեր կառույցների տեսակետը եւ իմ տեսակետն է, որ անպայման մեր երկրում քաղբանտարկյալներ չպետք է լինեն այսօր կամ վաղը: Ով է որոշում քաղբանտարկյալ է…»:
Aravot.am-ը հետաքրքրվեց՝ Դուք վիրավորված չե՞ք լինի, երբ նախագահ դառնաք, բայց Բաղրամյան 26-ում չնստեք, ձեզ այլ նստավայր տան՝ նա պատասխանեց. «Ընդհակառակը, իմ կարծիքով, եթե ես առաջադրվեմ, ընտրվեմ, ես պետք է լինեմ ոչ թե երրորդ հանրապետության չորրորդ նախագահը, այլ՝ 4-րդ հանրապետության առաջին նախագահը»:
Հարցին՝ Ձեզ հետ կապված որակումներ, գնահատականներ կան, Ձեզ անգամ ԿԳԲ-ի գործակալ անվանեցին, ինչպե՞ս եք վերաբերվում դրանց՝ Արմեն Սարգսյանը պատասխանեց. «Գիտեմ, մասոն, այլմոլորակային, ինչ ուզեք ասացին»:
Հռիփսիմե ՋԵԲԵՋՅԱՆ
