ՀՀ գլխավոր դատախազ Արթուր Դավթյանը պատասխանելով Medialab.am-ի խմբագիր Մարիաննա Գրիգորյանին ուղղված սպառնալիքների վերաբերյալ «Ազատություն» ռ/կ-ի թղթակցի հարցին՝ ասաց. «Մենք անմիջապես ուղարկեցինք ոստիկանություն` նյութեր նախապատրաստելու, նյութերի նախապատրաստման փուլում պարզվել է անձը, որը համապատասխան գրառումներ է կատարել Medialab.am-ի խմբագրի նկատմամբ:
Այդ անձը հրավիրվել է ոստիկանություն, նրանից վերցվել է բացատրություն, որի արդյունքում արդեն նյութերում քրեական գործ հարուցելու համար հիմքերը բավարար համարելով` հսկողություն իրականացնող դատախազը վերցրել եւ այդ փաստով հարուցել է քրեական գործ:
Քրեական գործն ուղարկել է Քննչական կոմիտե` նախաքննություն իրականացնելու համար: Քննիչը անմիջապես ստանալով այս քրեական գործը` վարույթ կընդունի, կհրավիրի հաղորդում տված անձին, նրան կտա համապատասխան տուժողի կարգավիճակ եւ կիրականացվի օբյեկտիվ քննություն»:
ՀՀ գլխավոր դատախազը համարում է, որ հանրային հետաքրքրություն առաջացրած այս խնդրի առումով իրենք արդյունք ունեն. «Մենք ունենք անձ, որը համապատասխան հաղորդագրությունների հեղինակն է, մեզ մնում է ընդամենը պատշաճ քննության արդյունքում նրա արածին տալ իրավաչափ քրեաիրավական գնահատական…10 օր քրեադատավարական օրենքը նախատեսել է միայն նյութերի նախապատրաստման համար, եւ 10 օրը այն ժամկետը չէ, որ ասենք, թե մեր ժամանակը, կոպիտ ասած, անգործության ենք մատնել»:
Գոհար ՀԱԿՈԲՅԱՆ
