ՀՀ գլխավոր դատախազ Արթուր Դավթյանը փետրվարի 9-ին կայացած ասուլիսում անդրադարձավ բնակարանային գողություններին: Ասաց, որ 2017 թ արդյունքներով 25 տոկոսով նվազել են բնակարանային գողությունները, որոշակի չափով բարելավել է դրանց բացահայտման ցուցանիշը:
Ինչ վերաբերում է կոռուպցիոն հանցագործություններին, ՀՀ գլխավոր դատախազի ձեւակերպմամբ. «Եթե 2016թ ընթացքում կաշառք տալու, ստանալու, կաշառքի միջնորդության վերաբերյալ 71 դեպք է արձանագրվել, ապա 2017-ին 92-ով կամ 130 տոկոսով ավելի դեպքեր են արձանագրվել: Այդ դեպքերը կազմել են 163-ն են: 10 տարի առաջ` 2007-ին նման դեպքերն ընդամենը 7-ն էին»:
Կաշառքի հետ կապված հանցագործությունների գծով Արթուր Դավթյանը զուգահեռներ տարավ Ադրբեջանի հետ` 9 ամսվա ցուցանիշներով, եթե մեր երկրում նման դեպքերը 120-ն են, Ադրբեջանում դրանք եղել են 19-ը:
Նա նաեւ նշեց, որ բացահայտումները Հայաստանում մեծ թիվ են կազմում. «2017-ին 43 պաշտոնատար անձ է դատի տրվել կաշառք ստանալու մեղադրանքով, իսկ 2016-ին այդպիսի 26 պաշտոնատար անձինք են դատի տրվել: 56 պաշտոնատար անձ էլ պաշտոնական դիրքը չարաշահելու համար է դատի տրվել: Այս թիվը երկու անգամ պակաս է եղել 2016-ին»:
Գոհար ՀԱԿՈԲՅԱՆ
