«Ժիրայր Սեֆիլյանի եւ մյուսների գործով» դատական նիստում այսօր դատարանը ցանկանում էր անցնել մեղադրական ճառի հրապարակմանը, երբ Սեֆիլյանի շահերի պաշտպաններից փաստաբան Տիգրան Հայրապետյանը հայտարարեց՝ ամբաստանյալներից Գեւորգ Սաֆարյանը սանկցիայի է ենթարկված եւ հեռացված նիստերի դահլիճից, իսկ նրա պաշտպանը ներկա չէ, ուստի պետք է հետաձգել նիստը:
Դատավոր Տաթեւիկ Գրիգորյանը հետաձգելու հիմքեր չտեսավ, քանի որ Սաֆարյանի հանրային պաշտպանն էր ներկա: Ապա Հայրապետյանը միջնորդեց Սաֆարյանին վերադարձնել նիստերի դահլիճ, սակայն Տաթեւիկ Գրիգորյանը չքննեց միջնորդությունը, քանի որ Հայրապետյանը Սաֆարյանի պաշտպանը չէ:
Ամբաստանյալներից Ժիրայր Սեֆիլյանը հայտարարեց՝ քանի որ դատավորը Սաֆարյանին չի վերադարձնում նիստերի դահլիճ, ինքը լքում է նիստը: «Որ խոսում եմ՝ լսեք, դուք դատավոր չեք»,-ասաց նա դատավորին: Տաթեւիկ Գրիգորյանը որոշեց Ժիրայր Սեֆիլյանին սանկցիայի ենթարկել եւ իր կարգադրությունը չկատարելու համար հեռացնել նրան նիստերի դահլիճից՝ 10 ժամով:
Ապա Գեւորգ Սաֆարյանի հանրային պաշտպան Աննա Ջուվանովան ներկայացրեց նույն միջնորդությունը, ինչը դատարանի կողմից արդեն բավարարվեց, եւ Սաֆարյանն ու Սեֆիլյանը վերադարձվեցին նիստերի դահլիճ, որպեսզի լսեն մեղադրական ճառի հրապարակումը: Դատավոր Տաթեւիկ Գրիգորյանն ընդգծեց՝ նրանց հանդեպ սանկցիան իրավաչափ է եղել, սակայն դատարանը նրանց եւս մեկ հնարավորություն է տալիս ներկա գտնվելու նիստին:
Հիշեցնենք, որ «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ (ամբաստանյալներ՝ Ներսես Պողոսյան, Սասունիկ Կիրակոսյան, Գալուստ Գրիգորյան, Հովհաննես Պետրոսյան, Գեւորգ Սաֆարյան, Հրայր Թոփչյան) ձեւավորելու, զորամաս եւ Երեւանի հեռուստաաշտարակը զավթելու փորձի մեջ:
Լուիզա ՍՈՒՔԻԱՍՅԱՆ
