Ամանորից հետո Երեւանի քաղաքապետարանը կրկին հայտնվեց քննադատությունների թիրախում՝ իր ծախսերի առումով: Մասնավորապես, 10 մլն-ի սառցե քանդակներ եւ ծաղկեփնջեր էր գնել, զարդարել շենքը: Այսօր լրագրողների հետ զրույցում Երեւանի փոխքաղաքապետ Կամո Արեյանից Aravot.am-ը հետաքրքրվեց՝ քաղաքապետարանը չի՞ մտածում վերանայել իր այդ ծախսերը, որոնց պատճառով անընդհատ քննադատության թիրախում է լինում: Լրագրողները հիշեցրին 30 մլն-ի կոնյակի դեպքը՝ ասելով, որ դաս չեղավ փաստորեն:
Կամո Արեյանը պատասխանեց. «Դաս է եղել, պարզապես շատ համով թեմա ունեք, ամեն տարի անցնում եք էդ հարցերին: Ի սեր Աստծո, հայտարարվել է, բյուջեն հրապարակային քննարկվել է, ավագանու նիստում, հանրային քննարկումներում ընթացել է բյուջեի քննարկման ամբողջ ընթացակարգելը, այդ ծախսերը հիմնավորված, չափավորված ծախսեր են՝ համահունչ քաղաքապետարանի ծախսերին»:
Նա ասաց, որ չգիտի, թե ով է գնահատել այդ ծախսերը եւ որտեղից հայտնվեցին այդ թվերը: Ըստ նրա, այդ ծախսերի թեման արծարծելով՝ կենցաղային բամբասանքի է վերածվում. «Այդ ծախսերը հիմնավորված են, չունեմ այլ պատասխան ձեզ, ցտեսություն, հաջողություն, մնաք բարով»:
Հռիփսիմե ՋԵԲԵՋՅԱՆ
