Ադրբեջանում հիմնական ընդդիմադիր գործիչները հրաժարվում են հոկտեմբերի փոխարեն ապրիլին նշանակված ընտրություններին մասնակցելուց, իսկ ազդեցիկ քաղաքական գործիչ Իլգար Մամեդովը կալանավայրում է, եւ գուցե ընտրություններից հետո միայն ազատ արձակվի: Այս մասին այսօր «Հենարան» մամուլի ակումբում լրագրողների հետ զրույցում անդրադառնալով Իլհամ Ալիեւի՝ արտահերթ նախագահական ընտրություններ նշանակելու որոշմանը, ասաց իրանագետ Արտյոմ Տոնոյանը:
«Ադրբեջանի «Ազգային խորհուրդը», որն ընդդիմադիր կուսակցությունների դաշինքն է, եւս բոյկոտելու է ընտրությունները: Մյուս թեկնածուները, որոնք հայտարարել են մասնակցության մասին, անկախ քաղաքական դեմքեր չեն: Ալիեւը լուրջ մրցակից չի ունենալու, այդ անձինք նրա հրահանգով են թեկնածությունն առաջադրել»:
Փորձագետը նկատեց՝ արտահերթ ընտրություններ անցկացնելու որոշումը կայացվել է բավականին արագ. «Հիմնավորումները, որոնք ասում է Ալիեւի շրջապատը, պատճառաբանված չեն՝ տոնակատարություն, բերքահավաք…լուրջ չէ: Սա ենթադրում է, որ այդ որոշումը շատ արագ է կայացվել: Կլանային խնդիրներ կան, որոնք հանրության համար հասանելի չեն»:
Արտյոմ Տոնոյանը հավելեց՝ հնչեցին կարծիքներ, թե Ադրբեջանում ընտրությունների արտահերթ անցկացումը կարող է պայմանավորված լինել Ադրբեջանի կողմից Արցախյան հակամարտությունում փոփոխություններ մտցնելու միտմամբ, բայց այդ վարկածը պետք չէ անհարկի գերագնահատել:
Լուիզա ՍՈՒՔԻԱՍՅԱՆ
